Адвокаттың абыройы немен өлшенеді? Олар кімдерге тәуелді? Мемлекет кепілдік берген заң көмегінің құны қанша? МКЗК (мемлекет кепілдік берген заң көмегі) бағдарламасы бойынша минуттық төлемнен сағаттық төлемге көшу адвокаттық қызметтің сапасын арттыра ала ма? Осы және өзге де маңызды сұрақтар кеңінен сөз болған басқосуға Әділет министрі Қанат Мусин, Мәжіліс депутаты Снежанна Имашева, Республикалық адвокаттар алқасының төрағасы Айдын Бикебаев, Жоғарғы сот, Бас прокуратура, Сыбайлас жемқорлыққа қарсы іс-қимыл және Қаржы мониторингі агенттіктері, Ұлттық экономика, Қаржы, ІІМ өкілдері, Республикалық нотариаттық палатаның, Жеке сот орындаушыларының республикалық палатасының өкілдері, сондай-ақ бейнеконференц байланыс режімінде Республикалық адвокаттар алқасы төралқасының, заң консультанттары палаталары қауымдастықтарының мүшелері және аумақтық әділет департаменттерінің басшылары қатысты. Сондай-ақ дөңгелек үстел жұмысына Адам құқықтары жөніндегі уәкіл Эльвира Әзімова мен Президент жанындағы Кешірім жасау мәселелері жөніндегі комиссия төрағасы Марат Башимов қатысып, адвокаттық заң көмегін көрсету жүйесіндегі негізгі мәселелер бойынша ой-пікірлерін ортаға салды.
Іс-шарада адвокаттардың пенитенциарлық жүйемен өзара әрекеттесу мәселелері, атап айтқанда, адвокаттардың тергеу изоляторларына кіруі, қылмыстық-атқару жүйесі мекемелеріндегі адамдарға адвокаттық қызмет кепілдіктері мен қорғаушылардың іс жүргізу өкілеттіктерін кеңейтуге қатысты өзекті сұрақтар жан-жақты талқыланды. Заң қызметтерін көрсету саласын жетілдіру, сапасын арттыру бойынша нақты ұсыныстар айтылды. Мәселен, Республикалық адвокаттар алқасының төрағасы Айдын Бикебаев мемлекет кепілдік берген заң көмегі бағдарламасы аясында мемлекеттік бюджеттің төлем мөлшерлемелерін арттыру және шығыстарын ұлғайтуды ұсынды. Нақтырақ айтқанда, ол осы бағдарлама бойынша минуттық төлемнен сағаттық төлемге көшуді, демалыс, мереке және түнгі уақыттағы жұмысы үшін адвокатқа бұрын берілген жоғары төлемді қайтару қажеттігін алға тартты. Сонымен қатар іс-шара аясында адвокаттардың «Е-Заң көмегі» ақпараттық жүйесін пайдалану, құқық қорғау органдары ғимараттарында смартфондар мен ноутбуктерді қолдану, «мемлекеттік құпия» деп таңбаланған істер бойынша рұқсат алу кезінде туындайтын кедергілер мен мәселелерді шешу қажеттігі де айтылды.
«Республикалық адвокаттар алқасы көтерген мәселелердің денін дөңгелек үстелге қатысушылар қолдады. Алдағы күндері нақты мерзімдер мен орындаушыларды көрсете отырып, басқосу барысында талқыланған мәселелерді шешу бойынша Жол картасына қол қойылады», дейді А.Бикебаев. Дөңгелек үстелге қатысушылар мұндай кездесулер адвокатураны одан әрі дамыту бағыттары мен халыққа заң қызметтерін көрсету сапасын, сонымен қатар мемлекет кепілдік берген заң көмегін жақсарту жөніндегі нақты шараларды әзірлеуге мүмкіндік беретініне сенім білдірді. Талқылау барысында айтылған ұсыныстарды іске асыру жөніндегі нақты шаралар Жол картасында көрсетіледі.
