![Украина-Ресей: Келісімге үміт бар](/media/2022/03/17/aytenip-1111-19-1024x683.jpg)
В.Зеленский НАТО-дан Украина әуесін қорғауды және жойғыш ұшақ беруді бірнеше рет сұрады. Д.Байден әкімшілігі мен заң шығарушылардың көпшілігі мұндай қадамға барғысы келмейтінін білдірді, сондықтан В.Зеленский америкалықтардың талап етуін сұрап отыр. АҚШ үкіметінің мұндай қадамға баруы күмәнді. Алайда Конгресс пен Джо Байден Украинаға алыстан қаржылай көмек беріп, Ресейге экономикалық қысым көрсетумен шектеледі. АҚШ президенті өткен аптада бөлінген 1 миллиард долларға қоса, Украина қорғанысына тағы 800 миллион доллар қосымша бөлетінін жариялауы мүмкін.
Ұлыбритания премьер-министрі Борис Джонсон «Украинаның жақын арада НАТО-ға кіруі мүмкін емес» дейді, бірақ бұл шешімді ел президенті қабылдауы керек деп баса айтты. Володимир Зеленский де Украинаның НАТО қатарына қабылдануы екіталай екенін ашық білдірді.
Соңғы күндері Украинада шабуылдан, атыс алаңынан ақпарат таратып жүрген шетелдік журналистердің қаза болғаны туралы ақпарат тарады.
Украина президентінің кеңесшісі Ресейдің Украинаның Аустрия секілді бейтарап ұстанымды қабылдауы керек деген ұсынысы қабыл болмайтынын мәлімдеді. Екіжақты келіссөз тобының мүшесі Михаил Подоляк жергілікті БАҚ-қа берген пікірінде кез келген бейбіт келісім Украинаның егемендігін сақтап қалатын тиімді шартта жасалуы керек деп атап өткен.
Елдегі ахуалға келер болсақ, ұрыс тоқтаған жоқ, адам шығыны бар. Ресей снарядтары Киевтегі екі көп қабатты тұрғын үйге құлап, екі адам жарақат алған. Ел астанасында екі күнге коменданттық сағат жарияланғандықтан халық бункерлерді паналауға мәжбүр. Қала әкімі «бұл Киев үшін аса қиын әрі қауіпті сәт» деп сипаттады. Украинаның төтенше жағдайлар қызметі елдің екінші үлкен қаласы Харьковта тұрғын үйге түскен снарядтан екі адамның қаза болғанын хабарлады. Украина өкілдері соңғы күндері Ресейдің шабуылы бәсеңдегенімен, құрбандар саны азаймағанын айтады. Ресей әскери-теңіз күштері Одесса маңында Қара теңізде шоғырланып жатқаны хабарланды, алайда Николаев айналасындағы көмекші әскер шегінген. Мариупольді 20 мың адам эвакуацияланғаннан кейін қоршау жалғасып жатыр. Ең ауыр шайқас шығыста, Луганск маңында жалғасып жатқанға ұқсайды. Ондағы Ресей әскерлері Днепр арқылы батысқа қарай оңтүстіктегі әскермен байланыс орнатуға тырысып жатыр делінген. Егер бұл әрекеті сәтті аяқталса, Донбастағы украин әскерінің қоршауда қалу қаупі бар.
Келіссөздерге келер болсақ, екі тарап та келісімге келуге аз болса да үміт бар екенін айтып отыр. В.Зеленский Ресеймен бейбіт келіссөздер нақтылана бастағанын айтты. Ал Ресейдің Сыртқы істер министрі «ымыраға келуге үміт бар» екенін, алайда келіссөздер «оңай жүріп жатпағанын» мәлімдеді. Дегенмен келіссөз жалғасып жатыр. Украина өкілі Михаил Подоляк келіссөздер барысында «түбегейлі қайшылықтар» барын, алайда «келісімге орын барын» атап өтті.
Осыған дейін Польша, Чехия және Словения премьер-министрлері Киевке жол тартқаны айтылған. Олардың сапардан аман-есен Польшаға оралғаны белгілі болды. Үш ел көшбасшысы осылайша Украинаға қолдауын білдіргілері келгенін айтқан. Олар – Украинадағы ұрыс қимылдары басталғалы елге келген алғашқы шетелдік тұлғалар.
НАТО-ның бас хатшысы Йенс Столтенберг Брюссельде өткен делегаттар кездесуінде қауіпсіздік блогы Украинаны бірауыздан қолдауды жалғастыра беретінін мәлімдеді. Ол Батыс көшбасшылары Киевке үлкен әскери қолдау көрсеткенін және бұл қолдауды жалғастыруға уәде бергенін айтты.
Украинадан Польшаға қашқан адамдардың саны 1,89 миллионнан асты. Бұл санды Польшаның шекара күзет агенттігі айтты. Варшава университетінің көші-қон мәселесін зерттеуші профессоры Мацей Душчиктің айтуынша, жарты миллионнан астам адам елден кеткен болуы мүмкін. Шекарадан өткендердің 94 пайызы Украина азаматтары болған.