Өткен жылдан бастап балаларды бұқаралық спорт түрлеріне белсенді тарту, сондай-ақ тегін спорт секциялары мен үйірмелерін ашу міндеті қойылғаны белгілі. Осы орайда мемлекеттік тапсырыс аясында спорт секциялары мен шығармашылық үйірмелерді жан басына нормативтік қаржыландыру тетігін жүзеге асыруға байланысты шаралармен таныстырып өткен Алматы қаласы спорт басқармасының басшысы Рүстем Байсеитов 4-тен 17 жасқа дейін, оның ішінде ерекше қажеттіліктері бар балаларға 71 спорт түрінен спорт секцияларына тегін қатысуға мүмкіндігі бар екенін атап өтті. Оның айтуынша, былтыр аталған жобаны жүзеге асыруға бюджеттен 1,2 млрд теңге бөлінді. Балалардың спортпен және шығармашылықпен тегін айналысуы ата-аналар үшін өте қолайлы. Мәліметтер бойынша, бір балаға спорт секциясына барудың орташа құны айына 20 мың теңгеден асады. Балалар үйірмелері мен спорт секцияларын жан басына қаржыландыруды іске қосу үрдісін жеделдету мақсатында Artsport.edu.kz ақпараттық жүйесі жұмыс істейді. Мемлекеттік спорттық тапсырысты жан басына нормативтік қаржыландыру аясында қазіргі кезде спорттың 37 түрінен тегін қатысуға мүмкіндік жасалған. Футбол, шахмат, таэквондо, дзюдо, жүзу ең көп сұранысқа ие секциялар қатарында.
Осы орайда қаланың Жетісу ауданында «Кемел» дене шынықтыру-сауықтыру кешенінің ашылуы да балаларға тегін үйірмелерге қатысуға мүмкіндік беретінін айта кеткен жөн. Кешен саламатты өмір салтын және бұқаралық спортты насихаттау, сондай-ақ ауданды кешенді дамыту мақсатында «Шетсіз қала» жобасы аясында ашылған. Мұнда көркем гимнастика, эстетикалық топтық гимнастика, бадминтон және шығыс жекпе-жегінің түрлері, сондай-ақ мүмкіндігі шектеулі балаларға арналған шахмат, тоғызқұмалақ секциялары жұмыс істейтін болады.
АЛМАТЫ
