2 сәуірде 24 жасқа толғалы отырған Тараз футбол мектебінің түлегі ең бағалы футболшылардың рейтингінде 10-орынды иеленген. Transfermarkt сайтының мәліметінше, қазіргі кезде Мәскеудің ЦСКА клубында өнер көрсетіп жүрген жерлесіміздің трансферлік құны 4 млн еуроны құрайды. Естеріңізге сала кетейік, Бақтиер Зайнутдинов өзінің спорттық мансабын «Таразда» бастады. 2018 жылы «Астанаға» ауысса, келесі маусымды Ресей Премьер-лигасындағы «Ростовта» өткізді. 2020 жылы ол ЦСКА-ның жейдесін киді. Сондай-ақ Зайнутдинов Қазақстанның ұлттық құрамасы сапында 21 рет жасыл алаңға шығып, 9 голдың авторы атанды.
Ал ең құнды жартылай қорғаушылардың көшін Руслан Малиновский бастап тұр. Бұл күндері Италияның А сериясында «Аталантаның» намысын қорғап жүрген 28 жастағы Украинаның Житомир қаласының тумасы 30 млн еуроға бағаланған. Екінші орында – Александр Головин. 25 жастағы ресейлік футболшы 2018 жылдан бері Францияның «Монако» клубының намысын қорғауда. Оның құны – 25 млн еуро. Үшінші сатыға Ресейдің тағы бір өкілі Алексей Миранчук жайғасты. 26 жастағы «Аталанта» ойыншысының бағасы 11 млн еуро шамасында.
Сонымен қатар «ТОП-10» жартылай қорғаушылар тізімінде Генрих Мхитарян (Армения, «Рома», 10 млн), Лукас Селараян (Армения, «Коламбус Крю», 8 млн), Рифат Жемалетдинов (Ресей, «Локомотив», 7,5 млн), Антон Миранчук (Ресей, «Локомотив», 7,5 млн), Виталий Буяльский (Украина, «Динамо», Киев, 7 млн) және Ильзат Ахметов (Ресей, ЦСКА, Мәскеу, 4,5 млн) сынды саңлақтар бар.
