Қолға алынған бастамалардың дені минералды шикізат өндіру мен өңдеуге қатысты. Қазірдің өзінде жемісін бере бастаған жобалар да бар. Мысалға, жақында Қаратал ауданында металлургиялық кремний өндіретін зауыт ашылды. «МК «KazSilicon» серіктестігінің жоғары маркалы металлургиялық кремний өндіретін зауытын іске қосуға 3,9 млрд теңге инвестиция тартылып отыр. Ал кәсіпорын толық қуатында жұмысқа кіріскенде 200 адам тұрақты еңбекпен қамтылады. Мұнан бөлек, комбинатқа қажетті маман даярлауға ерекше мән беріліп, осы аудандағы Бастөбе ауылындағы мамандандырылған колледжде электромонтер мен электр газ дәнекерлеуші кәсібін игеруге 48 маман арнайы даярланып жатыр. Яғни дуалды оқыту аясында комбинаттың базасында техник-механиктер мен көпірлі кран операторларын қайта даярлауға мүмкіндік жасалады.
Бұған дейін облыс әкімі Қанат Бозымбаев жаңа инвесторлармен кездесіп, осы жобаның жай-жапсарын талқылаған болатын. Соның нәтижесінде біршама жыл тоқтап тұрған кәсіпорынға аз уақыт ішінде жаңғырту жұмыстары жүргізіліп, қысқа мерзімде іске қосылды. Жаңғырту барысында құрылыс-жөндеу, жабдықтар мен пешті қайта іске қосу жұмыстары жүргізілді.
– Біз біршама жыл тоқтап тұрған KazSilicon металлургия комбинатының қалпына келтіріліп, қайта іске қосылғанына куә болып отырмыз. Жаңа инвесторлар комбинаттың екінші тынысын ашып, қысқа мерзім ішінде жаңғыртудан өткізді. Комбинатқа қажетті мамандар осы Қаратал ауданының өзінде даярланады. Жергілікті мамандар даярлау ісі басталып та кетті. Осы шаралардың барлығы Президенттің халықтың әл-ауқатын арттыру, тұрақты жұмыс орындарын ашу туралы тапсырмасын орындау мақсатында жүзеге асырылып отыр, – дейді облыс әкімі Қанат Бозымбаев.
KazSilicon металлургия комбинаты Қаратал ауданының Жылыбұлақ ауылына таяу жердегі «Сарыкөл» кен орнынан алынатын желілік кварц түріндегі шикізатпен өзін қамтамасыз етеді. Жалпы, кремний әлемде металлургия саласында, сол сияқты жоғары дәлдіктегі электр құрылғылары өндірісінде пайдаланылатындықтан үлкен сұранысқа ие. Бұл комбинатта жылына 6 мың тонна металл өндіріледі. Қазақстандық мазмұнның үлесі 80 пайыз болатын дайын өнімдер әлемнің жиырмаға жуық еліне экспортталмақ.
Инвестиция демекші, биыл Панфилов ауданында да құны 4,6 млрд теңгені құрайтын 19 жобаның негізі қаланбақ. Оның ішінде «Қорғас-Шығыс қақпасы» арнайы экономикалық аймағында 3 млрд теңге болатын 5 жобаны іске асыру көзделген. Бүгінде Жібек жолын дамыту жөніндегі халықаралық компания жылына 450 мың дана аяқ киім мен арнайы киім шығаратын кәсіпорын құрылысын бастады. Ал «КАЗ-АКВА» кәсіпорны 300 тонна балық өнімдерін дайындайтын және «Арыстан и Ко» компаниясы тәулігіне 25 тонна жүгері дәнін кептіретін өндірісті дамытуды жоспарлап отыр.
Алматы облысы
