Бұл күнде Тамды ауылында 1 547 адам тұрады. 246 үй бар. Ауыл ақсақалы Сейітхан Қойлыбаев әрдайым жастарды бірлікке, татулыққа шақырып келеді. Ауыл азаматтары да бір үйдің баласындай бірлікте ғұмыр кешіп отыр.
Тамды тұрғындары негізінен мал және егін шаруашылығымен айналысады. Сондай-ақ бұл ауылда 85 шаруа қожалығы мен 25 жеке кәсіпкерлік нысаны жұмыс істейді. Ал ауылдық округ әкімі Рауан Асқаровтың айтуынша, ауыл тұрғындары бүгінде ұйымшылдықпен тірлік істеп, берекесін бірліктен тауып отыр.
«Ауылда әлеуметтік аз қамтылған 31 отбасы бар. Азаматтар мүмкіндігінше мұқтаж жандарға көмек көрсетіп келеді. Бүгінде бірлігіміздің нәтижесінде ауыл азаматтары бірігіп, кезінде көгілдір отынға қосыла алмай қалған 6 үйге газ тарту жұмысын жүргізуде. Сонымен қатар бәрі ұйымдасып «Асарлатып үй салу» жобасы бойынша төрт баласы бар бір жас отбасына үй салып берді. Мұндай жұмыстар алдағы уақыттарда да жалғаса береді», дейді ол.
Тағы бір қуанарлығы, қазіргі кезде жастар ауылда тұрақтап қалып жатыр. Бірқатар азамат Қаратау қаласының іргесіндегі «ТаласИнвестКомпани» компаниясында және «Тараз-Жаңатас» бағытындағы темір жолда жұмыс істейді. Ауылда бірде-бір жұмыссыз жүрген жас жоқ.
Тамды ауылында газ, су мәселелері шешілген. Бүгінде ауыл азаматтары туған жерге ту тігіп, жұмыс атқаруда. 2016 жылы ауылдан шыққан кәсіпкер Жұмахан Танкебаев ауылға жаңа мешіт салып беріпті. Ал 2018 жылы балалар спорт алаңшасын пайдалануға берген. Бұл күнде Сейітхан Қойлыбаев, Қанат Құралбаев және өзге де ауыл ақсақалдарының бастамасымен ішімдік сату мүлде тоқтатылған. Ауылда қазір үш дүкен болса, оның ешқайсысында да арақ-шарап сатылмайды. Жастар да иман жолына бет бұрып, ішімдік атаулыны пайдаланбайтын болған. Алдыңғы буын ағалардың салған жолына түскен ауыл жастары да қазіргі кезде тәртіп пен татулықты қолдайды. Нәтижесінде, ауылда кейінгі үш жылда ешқандай тәртіп бұзушылық тіркелмеген. Қайта қолда барын бір-біріне бөліп беріп, берекелі күн кешіп жатқан ауыл азаматтары алдағы уақытта да талай игі істерді жүзеге асырмақ ниетте.
Жамбыл облысы
