«Қазақстан Республикасының кейбір заңнамалық актілеріне атқарушылық іс жүргізуді жетілдіру мәселелері бойынша өзгерістер мен толықтырулар енгізу туралы» ҚР Заңының жобасын әріптестеріне Мәжіліс депутаты Дмитрий Колода таныстырды.
Құжатта атқарушылық іс жүргізу мәселелері бойынша заңнамалық актілердегі олқылықтарды, коллизиялар мен қайшылықтарды, сондай-ақ сыбайлас жемқорлық көріністеріне ықпал ететін нормаларды жою көзделеді.
Мәжілістің Заңнама және сот-құқықтық реформа комитетінің төрағасы Арман Қожахметовтің айтуына қарағанда, заң жобасын қабылдау бірнеше мәселені шешуге мүмкіндік береді.
Олар:
- жеке сот орындаушыларының атқарушылық іс жүргізуді аяқтаған кезде алдыңғы жеке сот орындаушылары шығарған мәжбүрлеу шаралары туралы барлық қаулылардың күшін жою міндетін белгілеу;
- сыбайлас жемқорлық құқық бұзушылықты болғызбау мақсатында борышкерді шақыру негіздерін қысқарту;
- жеке сот орындаушыларының атқарушылық іс жүргізуді қозғау туралы қаулының көшірмесін жіберу және мәжбүрлеп орындату шаралары туралы хабар беру жөніндегі міндетін белгілеу. Заң жобасы қабылданған жағдайда мынадай оң құқықтық және әлеуметтік-экономикалық салдар көзделеді:
- атқарушылық іс жүргізуге қатысатын азаматтар мен ұйымдардың құқықтарын неғұрлым жақсы қамтамасыз ету;
- атқарушылық іс жүргізу мәселелері бойынша шағымдар мен өтініштердің санын азайту. Заң жобасын депутаттар бірінші оқылымда мақұлдап дауыс берді.
