Облыстық «Шаңырақ» халық шығармашылығы орталығының басшысы Жарқынбек Амантайұлының айтуынша, басты мақсат – қазақтың дәстүрлі ән өнерін және Майра Шамсутдинованың әншілік өнерін насихаттау, өскелең ұрпаққа үйрету, балалар шығармашылығын дамыту. Үйірмеге аймағымызға белгілі жезтаңдай әнші, республикалық дәстүрлі әншілер мен термешілер арасындағы байқаулардың жеңімпазы Салтанат Қисатова жетекшілік етеді.
Үйірме жұмысының басты ерекшелігі – қатысушылар баян аспабымен ән айтуды үйренеді. Жасыратыны жоқ, бүгінде өңірде баянмен ән айту дәстүрі кенже қалған. «Шаңырақ» орталығы олқылықтың орнын толтыруды көздеп отыр.
– Майраның біздің өңірге сіңірген еңбегі орасан зор, оны жаңғырту – біздің міндетіміз. Бұл – республикадағы алғаш рет ашылайын деп жатқан мектеп. Осы мектептің аясында көптеген жас өнерпаз, өнегелі жас Майраның әндерін меңгеріп, өнерін жалғастыруға мүмкіндік алады, – деді Жарқынбек Амантайұлы.
Майра Шамсутдинова 1890 жылы Павлодар қаласында дүниеге келген. 13 жасынан гармон тартып, ән салған. Әміре Қашаубаев және Иса Байзақовпен бірге Баянауыл, Қоянды жәрмеңкелерінде өнер көрсеткен. Қазақ әндерімен қатар татар, орыс әндерін де нақышына келтіре орындаған.
Жоғарыда қылқобыз үйірмесінің ашылғанын жаздық. Оған балалар мен жасөспірімдермен қатар, ересектер де қатыса алады. Аз уақыттың ішінде келушілердің қатары артқанын атап өткен жөн. «Шалқыма» үйірмесінің жетекшісі, дәстүрлі әнші Бөкен Жігердің айтуынша, қатысушылар ең бірінші кезекте сауат ашу күйлерін үйренеді. Кейін ынтасы болса, күрделі туындыларды үйрене алады. Үйірмені онлайн режімде де өткізуге мүмкіндік бар екенін атап өткен жөн.
Павлодар облысы
