«Сәуір болмай, тәуір болмас» дегендей, күн жылып, нағыз көктем орнаған шақта тұрғындар шаһардағы үйлердің іргелеріне, аулаларға, сондай-ақ көше бойларына көшеттер отырғызып, қаланың гүлденуіне үлес қосты. Мәселен, осы күні Сабалақов көшесіндегі облыстық көпбейінді аурухананың маңына мекеме қызметкерлерімен қатар көше тұрғындары да жиналып, 200 түп қарағаш еккенін көруге болады. Сол сияқты қаладағы №2 аумақтық округте орналасқан мекемелер мен көпқабатты тұрғын үйлерге округ басшысы Ескер Бұралқиев әкімдіктен бөлінген көшеттерді үлестіріп, ағаш отырғызатын аумақты қазуға жәрдемдескенін де атап өткен жөн. Аталған акцияда қаладағы №15 шағын ауданның №1, №5 және №25 үй тұрғындарының сұранысымен аулаға 152 түп тал жеткізілген. Бұл ретте қала тұрғыны Абай Өміртай ұрпақтар сабақтастығының өзі осы тал отырғызудан басталатынын айтады. Сондықтан да қала бойынша бастау алған бұл игі істі кейінгі ұрпаққа үлгі болады деп есептейді.
Аталған акция аясында жергілікті Aulieata-media жауапкершілігі шектеулі серіктестігінің ұжымы облыстық Aq jol газетінің 100 жылдығына орай Б.Момышұлы атындағы «Жеңіс» саябағына 100 түп терек отырғызды. Сонымен қатар аймақтағы ата басылымда әр жылдары еңбек еткен Елен Әлімжан, Тұрсынхан Толқынбаев, Қуаныш Иембердиев, Болат Жаппаров, Баймахамбет Ахмет сияқты ардагер журналистер де келіп, жастармен жүздесті. Aq jol газетінің 100 жылдық тойы жыл басынан бері кең көлемде аталып өтуде. Мерейтойдың жалғасы болған бүгінгі акцияға шөберемді ерте келдім. Қарап отырсам, ата газетте сол кездегі Жамбыл қаласына алғаш келген жылдан бастап еңбек етіппін. Одан бері де 52 жыл зулап өтті-ау», дейді жазушы, ардагер журналист Елен Әлімжан.
Ал Тараз қаласының әкімі Ержан Жылқыбаев шаһарда бастау алған «Менің қалам – менің аулам» атты акциясының негізгі мақсаты – қала тұрғындарын тазалыққа шақырып, көктемгі ағаш отырғызу маусымына тарту болғанын жеткізді. Өз сөзінде әкім қаладағы еңбектеген баладан еңкейген қарияға дейін акцияға үн қосып отырғанын айтты.
Жалпы, акция барысында тұрғындар әл-Фараби көшесінің бойына, №1 көпбейінді аурухана аумағы мен «Астана» шағын ауданының маңына 300 түп тал отырғызды. Сол сияқты, «Есенин» скверіне, Сүлейменов көшесі бойына, «Төңкеріс», «Телеорталық» тұрғын алабтарына және Абай даңғылының бойына 300 дарақ егілді. Акция барысында «Барысхан» тұрғын алабы, Құрманбетов, Қызылқайнар, Қуанышбаев, Алматы көшелері де қамтылды. Сонымен қатар «Әулие бұлақ» аумағына, «Қарасу» шағын ауданына да 300 көшет егілді. Тал егу үрдісі Әйтеке би, Қазыбек би көшелерінде де жалғасын тапты. «Қарасу-2» каналының бойы мен «Самал» шағын ауданында 200 түп тал отырғызылса, «Бәйтерек» шағын ауданы және №3 лицей мектеп аумағына 500 көшет егілді. Жалпы алғанда көне шаһардағы әрбір ауданда, әрбір көшеде мыңдаған түп тал егіліп, тамыр жайды.
Жамбыл облысы
