Түркия соты интернетке қойылған шектеулердің біразын алып тастады

Түркия соты Youtube  сайтына қойылған шектеуді алып тастады, деп хабарлайды ИТАР-ТАСС агенттігі. Сот сайтқа толық шектеу қою жөніндегі шешімін қайта қарап шығып, оны алып тастауға шешім қабылдады. Дегенмен, белгілі бейнематериалдарға шектеу сол күйінде қала бермек. Сот сайтқа толық шектеу қою Конституцияның 26-шы бабымен қорғалатын сөз бостандығына нұқсан келтіретінін мәлімдеді. Сот шешімінде жергілікті провайдерлермен шектеу қойылған 15 бейнематериалға тікелей сілтеме жасалған. Бұл бейнежазбалар түрік әскерінің Сирия аумағына кіргізілуі сөз болған Түркия басшылығының құпия жиналысынан алынған көрінеді. Сонымен қатар, 3 сәуірде Түркияның Конституциялық соты Twitter әлеуметтік желісіне қойылған шектеуді заңсыз деп танып, бұл әрекеттің сөз бостандығы мен адам құқықтарына қарама-қайшы келетінін жеткізді. Осыған байланысты Түркия үкіметі Twitter әлеуметтік желісіне қойылған шектеуді де алып тастаған болатын. Айдар Өрісбаев. Дереккөз: Itar-tass.com. Фото: Dw.de.