Университеттің желілік инженерлік мектебі

Облыстың Білім басқар­ма­сының қолдауымен жүзеге асырылып жатқан ауқымды жоба бойынша ШҚТУ алаңында өңірдегі 27 мектептің 9-11 сы­нып оқушыларына білім бері­ле­ді. Бұл жобаның қолға алынуына тағы бір себеп – соңғы жыл­дары Ұлттық бірыңғай тес­ті­леуді тапсыру кезінде бе­йін­ді пәндер ретінде физика мен мате­матиканы таңдайтын талап­керлер саны тым төмендеп кеткен. Мұның өзі техникалық мамандардың азаюына әкеліп соғуы мүмкін.

Осы мәселені шешу үшін университет ректоры Жасұлан Шаймардановтың бастауымен бірнеше жылдан бері облыс мектептерінде инженерлік сыныптар құру жұмысы жүр­гі­зіліп келеді. Демалыс кезінде ба­лалар университет базасын­да физика мен математика пән­де­рін тереңдете оқиды. Нәтиже жаман емес, білім беру сапасы жаңа деңгейге көтерілді. Желілік инженерлік мектептің ашылуына орай жоғары оқу орны шаңырағында облыс мек­тептері директорларының қаты­суымен «дөңгелек үстел» өтті. Бұл іс-шараға олардың ресейлік әріптестері де онлайн режімде қосылды.

– EKTU Educational Aca­de­my желілік инженерлік мекте­бі Д.Серікбаев атындағы уни­верситеттің әлеуетін пайда­ла­на отырып, оқушыларға те­рең­детілген білім беріп жатыр. Мақсатымыз да айқын: физика-математикаға қабілеті бар оқушылардың білімін те­реңдету. Сабақтың 50 пайызы офлайн режімде өтсе, 50 па­йы­зы – онлайн, – дейді аталған уни­верситеттің академиялық қызмет бойынша проректоры Жадыра Түсіпханқызы.

Айта кетсек, желілік инже­нер­лік мектепте кез келген бала оқи алмайды. Ол үшін шә­­кірттер арнайы сынақтан өту­ге тиіс. Мәселен, оқушы тес­ті­леуде 70 ұпайдан жоғары алса, тегін оқытылады. Ал 50 мен 69 аралығында ұпай жинаса, ақылы түрде оқиды. Ең тиім­дісі, инженерлік желілік мек­тепте білім алған түлек уни­вер­ситетке оқуға автоматты түр­де қабылданады. Жоба 2025 жыл­ға дейін жоспарланған.

Университетте желілік мектеп базасында сабақ беретін мұғалімдерге арналған курс­тар да ұйымдастырылған. Бі­лік­тілікті арттыру курсы ақ­ы­лы түрде бол­ғанымен, нәти­желі жұмыс ат­қарған мұғалім­дерге сыйақы да қарас­ты­рыл­ған.

Бүгіндері EKTU Educational Academy жұмыс жос­пар­лары келісіліп, мектеп құ­ра­мы­на оқу­шыларды және мұға­лім­дер­ді іріктеу басталады. Желі­лік ин­женерлік мектеп аясында оқу­шылар инженерлік математика, физика бойынша күшей­тілген даярлықтан өтеді, қол­дан­­балы ғылыми жобаларды іске асырады, олимпиадаларға қаты­сады, демалыс кезінде олар­ға уни­вер­ситеттің ғылыми-зерт­теу және зертханалық базасы ұсынылады. Сонымен қатар жоғары сынып оқушылары жазғы мектеп аясында Бұқ­тыр­ма су қоймасының жаға­лауындағы «Простор» жазғы лагерінде дайындықтан өтеді.

Желілік инженерлік мек­теп­тің ашылуы ерекше формат­та өтті. Себебі әдеттегідей лента қию, ұзын-сонар баяндамалар бол­ған жоқ. Әркім өз тіле­гін қысқа да нұсқа білдірді. Сонау Мәс­кеудегі жоғары оқу орын­да­рының ұстаздарына дейін жылы лебіздерін білдіріп, кө­мек­ке әрқашан әзір екендерін жеткізді.

Жиын соңында Тарбағатай, Катонқарағай, Зайсан аудандары мен Курчатов, Риддер қала­ларынан келген ұстаздар, мектеп директорлары университет ішін аралап, атқарылып жатқан жұмыстармен танысты.

 

Шығыс Қазақстан облысы