Өмірге бейімделген театр

«Астана Опера» мемлекеттік опера және балет театрындағы қойылымдар мен кон­церттердің билеті заманауи онлайн үлгі­­сінде сатыла бастады. «Астана Опера» театры билетті сатудың электрондық жүйесін іске қосты. Билеттер саудаға билеттік оператор Biletbar.kz арқылы түсетінін, билетті сату жөніндегі виджет театрдың сайтында орналасқанын хабарлаған театрдың баспасөз қызметі, сондай-ақ кассадан және интернет арқылы сатып алынатын билеттердің бағасы бірдей болатынын ескертті. Билетті сату ережесі бұрынғыша қала бермек. Мысалы, билетті басқаға айыр­бастай алмайсыз және кері қайтару да мүмкін емес. Аталған жобаны жүзеге асыру Негізгі залдың да, Камералық залдың да қойылымына билетті сатып алу жолын жеңілдетеді әрі ыңғайландыра түседі. Билетті қай жолмен сатып алсаңыз да барлық сатылым бір жүйе арқылы жүзеге асатындықтан, бір орынға билетті әртүрлі сауда нүктесінен сату мүмкіндігіне жол берілмейтінін айта кеткен жөн. Билетті сату жүйесі ашық түрде жүргізіледі. Сатылған әр билет жүйеде тіркелетіндіктен оны өз күшіңмен немесе бағдарлама арқылы өшіру және өзгерту негіз­сіз. Сондай-ақ, билетті қолдан жасау сияқты алаяқтық әрекеттердің жолы күні бұрын кесіліп отыр. Әр билет орны, қатары, қалай және қай уақытта алынғаны жайында нақты сатып алу дерегі бар QR кодпен қам­тылған. Залға өтерде осы код ар­найы құралдың көмегімен скан­нан шығарылып, ақпарат оқы­лады, осылайша билет тексеруден өтеді. Айта кетейік, смартфоны және планшеттік құрылғысы бар адам­­­ға билетті басып шығарудың қа­же­ті жоқ, өйткені, электрондық би­лет опциясы іске қосылып отыр. «Егемен-ақпарат».