Іс-шараның күн тәртібінде екіжақты қарым-қатынастың өзекті мәселелері, оның ішінде азаматтық қоғамның дамуы, діни сенім бостандығы, Қазақстандағы саяси реформалар, әйелдердің құқықтары, бостандықтары мен мүмкіндіктерін кеңейту қамтылды. Тараптар сондай-ақ өңірлік және көпжақты форматтардағы ықпалдастық мәселелерін талқылады.
АҚШ Мемлекеттік хатшысының орынбасары Узра Зея Президент Қасым-Жомарт Тоқаевтың Қазақстанның қоғамдық-саяси жүйесін одан әрі демократияландыруға және «Жаңа Қазақстан» құруға бағытталған саяси реформаларын қолдайтынын және АҚШ-тың еліміздегі жаңғырту әрекеттеріне мейлінше қолғабыс жасауға дайын екенін растады.
АҚШ делегациясының Нұр-Сұлтанға сапары шеңберінде америкалық қонақты Қазақстан Республикасы Премьер-Министрінің орынбасары – Сыртқы істер министрі Мұхтар Тілеуберді қабылдап, екі мемлекет арасындағы кеңейтілген стратегиялық серіктестіктің негізгі мәселелерін талқылады.
Отырыстан кейін Узра Зея мен Сыртқы істер министрінің бірінші орынбасары Ақан Рахметуллин бұқаралық ақпарат құралдарына кездесудің қорытындысы туралы әңгімелеп берді.
«АҚШ Мемлекеттік хатшысының азаматтық қауіпсіздік, демократия және адам құқықтары жөніндегі орынбасары Узра Зеяның сапары аясында ҚР Президенті Әкімшілігі Басшысының орынбасары – Қазақстан Президентінің Халықаралық ынтымақтастық жөніндегі арнайы өкілі Ержан Қазыханның тең төрағалығымен Қазақстан мен АҚШ арасындағы адам құқықтары мен демократиялық реформалар жөніндегі жоғары деңгейдегі диалогтің бірінші отырысы өтті. Бұл тетік екіжақты қарым-қатынасқа қосымша серпін береді және Қазақстанның демократиялық күн тәртібін ілгерілетуге бағытталған», деді А.Рахметуллин.
Вице-министрдің айтуынша, іс-шара барысында тараптар БҰҰ-ның Адам құқықтары жөніндегі кеңесіндегі ынтымақтастық, діни сенім бостандығы, Қазақстандағы саяси реформалар, халықтың әлжуаз тобының құқығын қорғау және ықпалдастыру, адам саудасына қарсы іс-қимыл мәселелері талқыланған. Сонымен қатар әйелдердің, мүмкіндігі шектеулі адамдардың құқықтары мен мүмкіншіліктерін кеңейту, қауіпсіздік, құқық қорғау салаларындағы ынтымақтастық, жемқорлықпен күрес мәселелері қозғалды.
«Президент Қасым-Жомарт Тоқаев бастамашылық жасаған елді одан ары демократияландыруға, адам құқықтарының сақталуын қамтамасыз етуге бағытталған саяси реформаларға баса мән берілді. Америкалық тарап Мемлекет басшысының саяси және әлеуметтік-экономикалық салалардағы, мемлекеттік институттардағы саясатын одан ары жүзеге асыруға қолдау білдірді. Қазақстан мен АҚШ сындарлы ынтымақтастықты одан ары қолдауға және жоғарғы деңгейдегі стратегиялық серіктестікті кеңейтуге ниетті», деді Ақан Рахметуллин.
АҚШ Мемлекеттік хатшысының азаматтық қауіпсіздік, демократия және адам құқықтары жөніндегі орынбасары Узра Зея елімізде болған Қаңтар қасіретін тергеу барысына қатысты пікір білдірді.
«Қазақстанда болған оқиғаларға қатты алаңдадық. Үкіметтің осы оқиғаларға қатысқандардың барлығын анықтап, жауапқа тартуға қатысты бүкпесіз жауабын қолдаймыз. Бірақ, сонымен қатар мұның барлығы заңнамаға сай болуға тиіс. Қазақстанда адам құқығын ілгерілетуге қолдау білдіреміз», деді У.Зея.
Сондай-ақ ол екіжақты қарым-қатынастың 30 жылдығы атап өтіліп жатқанын, Қазақстанмен өзара байланысты тереңдетуге мүдделі екенімізді растады. АҚШ тарапы Қасым-Жомарт Тоқаевтың 16 наурызда жариялаған саяси күнтәртібін қолдайтынын атап өтті.
«Президент бастамалары жүзеге асса, ол Қазақстанның барша қазақстандықтар үшін әділ әрі инклюзивті орынға айналуына көмектеседі. Орталық Азиядағы тұрақтылық пен өркендеуді ілгерілету мақсатымызда Қазақстанның орны ерекше», дедіУзра Зея. Сапар аясында АҚШ делегациясы Қазақстандағы бірқатар басқа да ресми тұлға және азаматтық қоғам өкілімен кездесуді жоспарлап отыр.
