![Әлихан Смайылов Қырғызстан елшісімен кездесті](/media/2022/04/15/crop-5_6_330x588_00.jpg)
Келіссөз барысында сауда және инвестициялар, транзит және көлік, сондай-ақ су-энергетикалық теңгерім салаларындағы ынтымақтастық мәселелері талқыланды. Әлихан Смайылов бауырлас екі ел арасындағы 30 жылдық дипломатиялық қарым-қатынас кезінде саяси, сауда-экономикалық және мәдени-гуманитарлық салаларда өзара түсіністік қалыптасқанын атап өтті.
Өзара сауда мәселесін талқылай отырып, Премьер-Министр тауар номенклатурасын кеңейту қажеттігі туралы пікір білдірді. Сауда-экономика саласындағы негізгі жетістік өзара сауда көлемінің ұлғаюы және белгіленген $1 млрд-қа қол жеткізу болды. Жаңа міндет — тауар айналымының көлемін $2 млрд-қа жеткізу.
«Бізде сауданы ұлғайту әлеуеті бар 190 тауар позициясы бойынша ұсыныс бар. Бізге Қарасу-Ақтілек өткізу бекеті маңында индустриялық сауда-логистикалық кешендер құру жобасын іске асыруды жеделдету қажет», деді Ә. Смайылов.
Су-энергетика саласындағы өзара іс-қимылға қатысты Министрлер кабинетінің басшысы бұл саладағы мәселелер жүйелі түрде шешіліп жатқанын атап өтті. Д. Дюшекеев өз кезегінде Қырғызстан тарапының Қазақстаннан тікелей инвестициялар тартуға мүдделі екенін жеткізді.
«Біз инвестициялық және сауда саясатын жетілдіру жолында белсенді жұмыс жүргізіп жатырмыз. Бизнес жүргізу және кәсіпкерлер мен инвесторлардың құқықтарын қорғау үшін қолайлы жағдайлар жасалып жатыр», деді Қырғызстанның Қазақстандағы Төтенше және Өкілетті елшісі.
Сондай-ақ Д.Дюшекеев ортақ мүдделерді қанағаттандыру аясында азық-түлік қауіпсіздігін қамтамасыз етуге қатысты ұсыныс айтты. Мұндай шешімнің мақсаты – сыртқы нарықтардағы тұрақсыздық жағдайында азық-түлік қауіпсіздігінің бұзылуының сын-тегеуріндерін төмендету үшін біріккен саясатты әзірлеу. Кездесу қорытындысы бойынша тараптар барлық қозғалған мәселе бойынша ымыраға келуге дайын екендіктерін білдірді.