Жол қозғалысын жолға қоятын тұжырымдама

«Қаланың бас жоспарында көліктік даму бөлімі бар. Бірақ уақыт талабы мен урбанизацияны, жаңа сын-тегеуріндерді ескере отырып, бұрылу алаңдары, жаяу жүргіншілер, бағдаршамдар және басқа да мәселелерді жазып, кешенді көлік схемасының дамуын жеке бөліп көрсету қажет. Әлемдік тәжірибеде қалалық және көліктік жоспарлау – қала құрылысының өзара байланысты және өзара тәуелді элементтері», деді Б.Игенбердинов.

Сонымен қатар көлік ком­пания­сының басшысы қала­лық көлікті басқаратын ұйым­дар ара­сын­дағы үйлестіру жұмыс­та­рын күшейту қажет екенін атап өтті.

«Бұған қоса магистралды кө­ше­лер мен өзен арқылы өтетін көпірлер санын арттыру қажет. Тұрғын орамдары құрылысын көліктер ауқымын ескере отырып жоспарлау керек. Бұл ретте қалалық көлікті басқару саласын­да­ғы стратегиялық құжат – ке­шен­ді көлік схемасын жасау ең дұ­рыс шешім болады», деді Б.Иген­бердинов.

Кешенді көлік схемасы (ККС) қалада қалалық көлікті ұйым­дас­тыру мен басқаруға қатысты қолданыстағы құқықтық жүйедегі олқылықтар мен қайшылықтарды анықтайды, жер пайдалану мен қалалық көлікті жоспарлауды, қалалық көлік саласына тартылған органдардың функциялары мен өкі­лет­тіктерін біріктіреді. Сон­дай-ақ қоғамдық көлік, жол-кө­лік инфрақұрылымы, жол қозға­­лысын ұйымдастыру, көлік ағын­­да­рын басқару, тұрақ кеңіс­тігі және т.б. салалардағы проб­ле­ма­лар­ды шешуді ұсынады.

Кешенді көлік схемасының тұжырымдамасын қалалық мәслихат бекітті. Үкіметпен, Ин­дус­трия және инфра­құры­лым­дық даму министрлігімен бірлесіп қаржыландыру көздері келісіледі. Бұдан әрі ККС-ті іске асыру қол­ға алынады. ККС әзірлеумен қатар Нұр-Сұлтан қаласының аума­ғын 2025 жылға дейін дамыту бағдарламасында нысаналы көр­сеткіштерді назарға алу қажет.

Айта кету керек, елорда әкім­дігі жол инфрақұрылымын дамы­ту­ға ерекше көңіл бөледі. Осы жылы 100-ге жуық көше салынып, жөнделеді. Кейінгі екі жылда 300-ге жуық көше жөнделді, оның жартысы – тұрғын үй алап­та­рындағы көшелер.

Сонымен қатар Ұлы дала даңғы­лында екі автокөлік көпірі­нің құрылысы жүріп жатыр. Бұл осы жылы аяқталады. Есіл өзені арқылы Тәуелсіздік даңғы­лын­да­ғы көпірдің құрылысы 2023 жылы аяқталады. Бұл жұмыстар аяқталса, жолдағы трафик айтар­лық­тай жеңілдейді. Сондай-ақ Алаш тас жолы бойындағы көпі­р­ге («бүкір көпір») күрделі жөн­деу, жаңа жолайырықтарын жобалау және т. б. жұмыстар жүр­гі­зі­ліп жатыр.