Бұл ауқымды шара 7 мамырда Астанада Отан қорғаушылар күніне орай ұйымдастырылады
Қазақстан Республикасының Президенті – Қарулы Күштердің Жоғарғы Бас қолбасшысы Нұрсұлтан Әбішұлы Назарбаевтың 2014 жылғы 19 наурыздағы Отан қорғаушылар күнін мерекелеу жөніндегі № 1362 нұсқауы бойынша Астана қаласында Әскери парад өткізіледі.
Әскери парад 2014 жылғы 7 мамырда Астана қаласындағы «Қазақ елі» алаңында өтеді. Парадқа Қорғаныс министрлігінің, Ішкі істер министрлігінің, Төтенше жағдайлар министрлігінің, Ұлттық қауіпсіздік комитеті Шекара қызметінің және Республикалық ұланның парадтық есептоптары, сондай-ақ, Қорғаныс министрлігінің, Ішкі істер министрлігі мен Төтенше жағдайлар министрлігінің әскери техникалары мен авиациясы тартылады.
Әскери парадтың салтанатты маршының жаяу легіне 2 мыңға жуық әскери қызметші, оның ішінде Қазақстан Республикасы Қарулы Күштерінің жеке құрамынан 1500 адам қатысады.
Механикаландырылған колоннадағы әскери техника саны 250 бірлікті және жеке құрамда 566 адамды құрайды (механик-жүргізушілер, экипаждар, десанттар). Сондай-ақ, парадқа 56-ға жуық ұшу аппараттары қатыстырылады.
2014 жылғы 14 сәуірден бастап парад есептоптары мен механикаландырылған колонналардың жаттығулары күн сайын өткізілетін болады. Елдік рухты көтеретін мұндай шаралар жастардың бойында патриоттық сезім қалыптастырып, отансүйгіштікке тәрбиелейтіні айтпаса да түсінікті. Сондықтан да әскери парад әскерилер тарапынан да жоғары жауапкершілікті, алға қойған мақсатты бір демде бір кісідей атқарып шығуды талап етеді. Жаттығуларды парадқа дейін күн сайын өткізу қажеттілігі де алдағы міндет үдесінен көрінуді діттейді.
Іс-шара Қорғаныс министрлігіне қарастырылған 2014 жылғы бюджеттік бағдарламаның ақшалай қаражаты көлемінде қамтамасыз етіледі, деп хабарлады Қазақстан Республикасы Қорғаныс министрлігінің баспасөз қызметі.
-----------------------------------------
Суретті түсірген
Ерлан ОМАРОВ.
