Астанада 100-ден аса адамды тақырға отырғызған күдіктілер ұсталды

Астанада 100-ден аса адамға жалпы сомасы 112 млн. теңгені құрайтын тауар мен ақшалай несие алдырған күдіктілер қолға түсті. Бұл туралы «Хабар» телеарнасы хабарлады. Қаржы полициясы агенттігі Айтбаева мен Отт есімді азаматшаларға қатысты   «алдын ала сөз байласқан топ болып, аса ірі көлемде алаяқтық әрекеттер жасау» дерегі бойынша қылмыстық іс қозғады. Олар 2013-2014 жылдары Астана қаласында 100-ден аса адамның сеніміне кіріп, «бұрын алған несиелеріңді жауып береміз» деген сылтаумен екінші деңгейлі банктерден жаңа несие рәсімдеуге көндіреді. Алайда, несиеге алынған қаражат пен тауарларды күдіктілердің өздері иемденген. «2014 жылғы 2 сәуірде Алматы ауданының №2 сотымен Айтбаеваға қатысты қамауға алу бұлтартпау шарасы қолданылды. Ал екінші күдіктіден асырауында жасөспірім екі баласының болуына байланысты ешқайда кетпеу қолхаты алынды. Аталған айыпталушылардың іс-әрекетінен жапа шеккен барлық тұлғаларды қаржы полициясы органдарына хабарласуын сұраймыз»,-дейді Экономикалық қылмысқа және сыбайлас жемқорлыққа қарсы күрес агенттігінің ресми өкілі Мұрат Жұманбай. Әмірхан Алмағанбетов. Дереккөз: «Хабар» телеарнасы. Фото: www. 1tv.ru.