Жұмыр жердің бетінде тіршілік басталған уақыттан бері айтылып келе жатқан жалғыз сұрақ бар: әлемді не ұстап тұр? Бұл тіпті адамзаттық сауалға ұласып, түрлі ғылым саласында һәм әдебиетте де, өнерде де, кинода да мәңгілік тақырыпқа айналды. Оған әркім әртүрлі жауап берер: біреу әлемді қара жер ұстап тұр десе, біреу Құдай, біреу адам дер. Бәлки, ақша, бәлки, ауа. Путин деп те айтатындар табылар (таңғалмаңыз). Кей адам дүниенің кілті ізгілікте дейді: жақсылық пен жылулық, мейірім мен сезім. Ал махаббат ше? Енді біреу әлемнің ұстыны адамдардың бірлігі дер. Иә, Украинадағы екі айдан астам уақыттан бері болып жатқан қақтығыстар жүрек ауыртар әсерінен бөлек барша әлемге бір ұғымды ұғындырған сияқты. Бірлік.
Бірлік деген де ұлттық мінезге жататын һәм қанмен сіңетін қасиет болса керек. Байқасаңыз, ұлтшыл, патриоттық рухы биік халықтардың бірлігі мығым болады. Мәселен, іргеміздегі Өзбекстан. Украиндарды да дәл қазір үрей мен қорқыныштан алшақ ұстап тұрған осы – бірлік. Яғни бірлік – тек бес-алты адамның бірігіп жұмыс істеуі емес, кейде тұтас бір ұлттың, мемлекеттің тағдырын шешетін сәтте де күш беретін қасиет. Тарихқа көз салсаңыз, ұлттың ұйыған бірлігімен аман қалған, яки азат болған елдер көп. Сонда бірлік ортақ келісім, ауызбіршілік сынды ұғымдардан бұрын ұлттық мінезден туады. Яғни нағыз бірлік адамға тек қанмен келеді.
Егер осы ұғымдар әлемді ұстап тұрған болса, адамды адам қылып тұрған не деген ойға да қаласың. Әрине, адамдық қасиеттер, ақ адал көңіл, кең пейіл, ыстық жүрек, суық ақыл деп бәріміз айтамыз ғой. Алайда кейде қоғамдағы сұмдық жағдайлар осы ізгі мінездерді бір сәтте жоқ қылады. Бір жағынан адамдар тек жақсы, мейірімді болуы керек деген заң жазылмаған. Сондықтан да ауруханадағы кезек үшін төбелесетін, он минут күтіп қалса, шапыраштана жөнеліп, тар өмірді одан сайын тарылтатын адамдарды соттай алмайсың. Тіпті сәлеміңе аузын жыбырлатып, самарқау амандасатын әріптесіңе де ештеңе дей алмайсың. Айналаңдағы барлық келеңсіздік, соғыс, апат, қайғы, әділетсіздік адамдардың қатқан жүрегінен жасалып жатса да ешкімге сот жоқ. Бұл қоғамда адамдар тек Қылмыстық кодексте жазылған қылмысы үшін ғана сотталады. Мейірімсіздігі үшін емес.
