Референдум дегеніміз халықтың саяси еркін тікелей білдіретін құрал болғанымен, біз сияқты тәуелсіздіктен кейін өмірге араласқан ұрпақ оны мүлдем көрген жоқ. Халық ұзақ жылдар бойы саяси процестерден шеттеп қалды. Мемлекет тағдырын шешу ат төбеліндей азғантай топтың ғана құзырында болды.
Халық үшін аса маңызды шешімдер Парламентте талқыланып, комиссияларда тар ауқымда талқыланулар жүрді. Осылайша жұрттың көп бөлігі шетте қалды, саяси өзгеріске қатысу мүмкіндігінен айырылды.
Бұрынғы Президент кезінде мерзімінен бұрын, түрлі сылтаулармен бұрмаланып өткізілген осындай бірнеше сайлауда азаматтардың дауысы, үміті, сенімі ұрланды. Бір адамның қолына шектен тыс билік шоғырландырылды. Оның арты кешегі қаңтар оқиғасына әкелгеніне бәріміз куә болдық.
Бұдан былай басқаша болуға тиіс. Халық тағдырын бір адам шешетін уақыт келмеске кетті. Шын мәнінде үлкен өзгерістер дәуіріне аяқ бастық. Тарихтың ащы сабағынан қажетті қорытынды жасай отырып, Жаңа Қазақстан құрамыз деп ниет еттік. Ескі тәсілдермен жаңа республика құра алмаймыз. Жаңа Қазақстан халықтың еркімен басталуға тиіс. Саяси жаңаруды жұртымыз тікелей түйсініп, өз болашағы өз қолында екенін сезіну үшін осындай зор тарихи мүмкіндік беріліп отыр.
Біз осы мүмкіндікті барынша ұтымды пайдаланып, демократиялық жаңғыру жолына түссек екен деген тілегім бар. Алдағы референдумға – ел өмірін жаңартар түбегейлі саяси бетбұрысқа бәріміз атсалысайық!
Уайс ЕРСАЙЫНҰЛЫ,
Ұлттық қоғамдық сенім кеңесінің мүшесі
