«Ішкі істер органдары ұрланған, заңсыз сақтаудағы және тіркелмеген қаруды табу мен алып қою бойынша жұмысты жалғастыруда. 1 499 қару мен 35,6 мыңнан астам оқ-дәрі тәркіленді.
Мәселен, Жамбыл облысы полиция департаментінің қызметкерлері жедел-іздестіру шаралары кезінде оқ-дәрісі бар 2 «калашников» автоматын сатпақшы болған жергілікті тұрғынды анықтады. Күдікті соттың шешімімен күзетпен қамауға алынды», деді Тергеу департаментінің бастығы.
Оның мәліметі бойынша, түсіндіру жұмыстарының нәтижесінде азаматтар 145 қаруды өз еркімен тапсырған.
«Өткен апта ішінде ғана Алматы облысында азаматтар 3 тегіс ұңғылы мылтықты берді. Қабылданған шаралардың арқасында полиция қызметкерлері жалпы сомасы 340 млн теңгеден асатын азаматтардың мүлкін тауып, қайтарды.
Мысалы, биыл 5 қаңтарда Алматы облысының 4 тұрғыны Алматы қаласында Әлімжанов көшесіндегі «Кcell» акционерлік қоғамның филиалынан жалпы сомасы 3 млн 555 мың теңгеге 27 ұялы телефонды ұрлаған.
Күдіктілер ұсталды және соттың санкциясынан оларға кепіл түрінде бұлтартпау шарасы қолданылды.
Медеу ауданы сотының үкімімен олар кінәлі деп танылды және жағымды мінездемелері, залалдың орнын толтырғаны ескеріліп, үш жылға бас бостандығын шектеуге сотталды», деді Санжар Әділов.
Бұған дейін ҚР ІІМ Тергеу департаментінің басшысы Санжар Әділов қаңтар оқиғасы кезінде әсіресе үш өңірде нысандар қатты тоналғанын айтқан еді.
Аяна Тоғанбек
