Қайраңда балық қырылды

Мәселен, 26 сәуірде Аты­рау қалалық әкімдігіне қарас­ты Қайыршақты ауылдық окру­гін­дегі Безымянный көлінде балықтың қырылу дерегі тір­кел­ді. Осыған байланысты атал­ған су айдынына арнайы құрылған комиссия құрамында «Жайық-Каспий» облысаралық бассейндік балық шаруашылығы инспекциясының инспекторлары жіберілді. Инспекторлар ба­лықтың қайраңға шығып, әл­сі­реп қалғанын анықтады.

– Балықтың қырылуына қай­раңға шығып қалғаны себеп болуы мүмкін. Әлсіреген балық­тарды құтқару жұмыстары жүр­гі­зілді. Соңғы бес күн бойы Безымянный көліне су келіп жа­тыр. Өлген балықтарды са­нитарлық талапқа сай жою қол­ға алынды, – дейді инспекция басшысы Нұрлыбек Гайсин.

Облыстық балық шаруашы­лығы басқармасының басшысы Артур Сәдібекұлының мә­лі­метінше, көктемде балықтар уыл­дырық шашу үшін қолайлы өріс іздейді. Безымянный кө­лін­де қырылған балық каналға келіп, тіреліп қалған. Сол себеп­тен, балықтардың уылдырық шашу орнына еркін кіруі үшін Қайыршақты округі аумағынан 800 метр канал қазылды. Канал­дың тереңдігі – шамамен 1 метр.

Балық шаруашылығы ко­ми­теті төрағасының орынба­са­ры Аян Бахияновтың мәліме­ті­не сүйенсек, былтыр су айдындарында 12 тонна балық қы­рылған. Ал биылғы 26 сәуір­де Безымянный көлінен 65 кило өлі балық жиналды. Ба­лық­тың қырылу дерегі 29 сәуірде Махамбет ауданындағы Алмағамбет көлінде де тіркелді. Бұл көлде өлген балықтың мөлшері 507 килоны құрады.

– Жайық өзеніне көктемгі тасқын су 24 сәуірде келе бас­тады. Қазір Индер ауданында Жайық өзеніне таяу орналасқан 22 көлдің төртеуіне су келді. Ал Махамбет ауданындағы 18 көлдің алтауына су шықты. Балықтың қырылуының басты себебі Жайық өзенінің сағасына шығып, су айдынына қайта орала алмауынан болған. Өйткені сағаларға су тез келіп жатыр. Су кері қайтқанда, оттегі де азай­ған, – дейді Аян Бахиянов.

Облыстық балық шаруашы­лығы басқармасының басшысы Артур Сәдібекұлының айтуынша, Махамбет ауданындағы Алмағамбет көліне 10 жылдан бері су шықпаған. Сусыз қал­ған көлде жыңғыл өсті. Биыл бұл көлге су келді. Көлге су­­мен бірге шыққан балық жың­ғылдың арасында қалып қойған, – деп мәлім етті Артур Сәдібекұлы.

Оның айтуынша, Алма­ғам­бет көлінде балықтарды құт­қа­ру жұмысына Жайық-Каспий облыс­аралық бассейндік ба­лық ша­руашылығы инспек­ция­сынан 40 инспектор, Алға ауылдық ок­ру­гінен 8 адам тартылды. Қа­зір өңірде 200-ден астам су айдыны бар. Оның 70-ке жуы­ғы қауіпті айдын қата­рына жатқызылған.