Сондықтан барлық қазақстандықтар референдумға белсенді қатысуы керек. Мен де әріптестеріммен бірге Мемлекет басшысының бастамасын толық қолдаймын. Әрі Мәжілістің Аграрлық мәселелер комитетінің мүшесі ретінде Президенттің қоғам мен мемлекет үшін аса маңызды саналатын жерге иелік ету мәселесін шешу қажеттігіне арнайы тоқталып, «Жердің және табиғи ресурстардың иесі халық» деген норманы Конституцияда біржола бекітуі бүгін ғана басталған іс емес екенін айтқым келеді. Себебі бұл бағытта ел Президенті жүйелі жұмыс істеп келеді. Мәселен, өткен жылы Парламентте «Жер кодексі» заң жобасына өзгерістер мен толықтырулар енгізіліп, Президент жерді шетелдік азаматтарға сатуға және жалға беруге тыйым салған шешім қабылдағаны баршаға мәлім. Енді міне, «жердің және табиғи ресурстардың иесі – халық» деген норманы Конституцияға кіргізіп, халық игілігі үшін жер мәселесін Ата Заңмен бекітіп жатыр. Мұның бәрі Мемлекет басшысының маңызды мәселелерде жүйелі бағытты ұстанып келе жатқанының бір дәлелі. Жер – ата-бабадан келе жатқан мұра. Біз де өз кезегімізде жерді, жер қойнаулары мен табиғи ресурстарды ұқыпты пайдаланып, келер ұрпаққа аманат етуіміз керек. Бұл Жаңа әрі Әділетті Қазақстанның басты ұстанымына айналуға тиіс.
Саяси қадам ішінде қолдауға тұратын өзгерістің бірі – Президенттің саяси бейтараптылығының заң жүзінде бекітілуі. Егер Мемлекет басшысы ешбір саяси партияның мүшесі болмаса демократиялық қоғамда көп партия жүйесі дамиды. Өз кезінде бұл сайлау жүйесін өзгертуге ықпал етеді. Әр адам өз болашағын айқындайды, көзқарасын білдіреді. Нәтижесінде, сайлауға көпшілік белсенді қатысып, сайлау адал өтеді. Осындай функциялар арқылы халық пен биліктің арасы жақындай түседі. Заман талабына сай қолға алынған реформа саяси жүйенің түлеп, қуаттана түсуіне жол ашады. Жалпы, мемлекеттік басқарудың тиімділігі артады.
Аманғали БЕРДАЛИН,
Мәжіліс депутаты