Әскери қылмыстың видеолары тарады

CNN агенттігінің хабарла­уынша, қаза тапқандардың бірі – Леонид Пляц есімді зейнеткер. Ол Украина астанасының сырт жағында орналасқан автоорталықта күзетші болып нәпақасын тауып жүрген.

Видеода бес сарбаздың ғимаратқа келгені, содан кейін күзетші Пляц пен тағы бір қызметкердің олармен сөйлескені көрінеді. Бірнеше минуттан кейін әскерилер бұрылып кетеді, ал марқұм екеуі өз орындарына қарай қайт­қан. Дегенмен екі сарбаз қай­тып оралып, кетіп бара жат­қан екеудің артынан автоматтан оқ жаудырады.

Біраз уақыт өткен соң Пляц­тың ақсаңдай басып, өз ор­ны­на жеткені, содан кейін біреуге телефон арқылы ха­бар­­ласқаны бейнеленген. CNN таратқан видео 16 нау­рыз күні түсірілген. Автоор­та­лық заманауи камералар­мен жабдықталғандықтан, ресей­ліктердің әрекеті жан-жақ­тан түсірілген екен. Олар бей­біт екі тұрғынды атып тас­та­ған­нан кейін ғимараттың іші­не кіріп, құнды дүниелер іздеген. Біреуі тартпалардың бірінен спирттік ішімдік тауып алып, соны ішеді.

Америкалық арна Ресейдің қорғаныс министрлігіне хабарласып, видеоға қатысты түсініктеме беруді сұраған. Бірақ ведомство CNN-нің сұ­ра­уына жауап бермепті. Бұған дейін батыс медиасы Ресей сарбаздары жасады де­лін­ген көптеген әскери қыл­мыстарды жариялаған еді.

Естеріңізде болса, 2 сәуір­де Киев түбіндегі Буча қала­сын­да жүздеген бейбіт адам­ның мәйіті шашылып жатқа­ны туралы ақпарат тарады. Бұл елді мекенді Ресей әс­кері соғыстың алғашқы күн­дері басып алып, бір айдай ба­қы­лауында ұстаған еді. Ха­лық­аралық қоғамдастық пен Украина тарапы бейбіт аза­мат­тардың өліміне Ресей сарбаздарын кінәлады. Кремль билігі мұны жоққа шығарып, Бучадағы қырғынды «жасанды қойылым» деп мәлімдеді.

Бірақ спутниктен түсірілген суреттер мен видеолар қаза тапқан бейбіт тұрғындардың мәйіті наурыздың ортасынан бері көшелерде шашылып жатқанын, яғни Ресей әскері қаланы басып алған мерзімде өлгенін дәлелдеді. Сонымен қатар Бучада велосипедпен кетіп бара жатқан тұрғынды танкпен атып өлтіргені де дрон арқылы түсірілген видеоға жазылып қалған екен.

Бұдан бөлек наурыздың басында бірнеше медиа, арасында ресейлік тәуелсіз арналар да бар, Киев маңындағы Макаров елді мекенінен шығар тұста V белгісі бар танктің бұрылыста тоқтап тұрған көлікті бірнеше рет атқаны жазылған видео жариялады. Кейінірек көліктің ішінде екі адамның болғаны, олардың 70-тен асқан зейнеткерлер екені анықталды.

БҰҰ-ның адам құқықтары жөніндегі басшысы соңғы апталарда Украина астанасы Киев аймағында мыңдаған мәйіттің табылғанын хабарлады. Ресей басып алған аймақ­та тексеру жүргізіліп жатқа­нын, Ресей сарбаздары әскери қылмыс жасауы мүмкін екенін жеткізді.

«Заңсыз кісі өлтірулердің ауқымы, соның ішінде Киев­тің солтүстігіндегі аудандарда өлім жазасына кесілгендердің ауқымы жан түршіктіреді», деді Мишель Бачелет Женева­да орналасқан Адам құқық­тары кеңесіне жолдаған бейне­үн­деуінде.

Біріккен Ұлттар Ұйымы­ның Адам құқықтары жөнін­дегі Жоғарғы комиссары (OHCHR) басқармасының мәлі­метінше, бүгінге дейін Украи­нада 3 496 бейбіт тұрғын қаза тауып, 3 760 адам жара­лан­ған. Соның ішінде балалар да бар. Ұйымның дерек­теріне сүйенсек, қайтыс бол­­ған­дардың көпшілігі ар­тил­ле­рия­лық және зымыран­дық шабуыл­дар мен әуе соққы­ларының құрбандары.

OHCHR сарапшылары қаза тапқандардың нақты саны әлдеқайда көп деп санайды. Өйткені соғыс жүріп жатқан аймақтардан алынған ақ­парат толық емес. Әрі мұқият тексеруді қажет етеді. Әсіре­се Мариуполь, Изюм және Попасная қалаларында қаза тапқандардың саны мыңдап саналуы мүмкін.

Мәселен, Мариуполь қала­сынағы театрға Ресей­ліктер зымыран тастағаны белгілі. Бұқаралық ақпарат құралдары онда мыңға жуық бала мен әйелдер бомбадан қашып, тығылып жатқанын жазды. Бірақ театрдағы жасырынғандардың қаншасы қаза тауып, қаншасы тірі қалғаны белгісіз.