Аймақтар • 16 Мамыр, 2022

Сайлаушылармен кездесті

Сенат депутаттары Конституцияға өзгерістер мен толықтырулар енгізу бойынша өтетін жалпыхалықтық референдумды талқылауға қатысу үшін ел ішіне келді. Халық қалаулыларының бір тобы Алматы облысына ат басын бұрып, ауыл, ауданда тұратын жұртшылықпен кездесу өткізді.

Қалмаханбет МҰҚАМЕТҚАЛИ

Жетісу өңірінде Сенаттың әлеуметтік-мәдени даму және ғылым комитетінің көшпелі отырысы өтті. Онда комитет төрағасы Бейбіт Исабаев облыс тұрғындары алдында сөз сөйлеп, өзгерістер мен толықтырулар Конституция баптарының үштен бір бөлігіне қатысты екенін баса айтты.

– Мемлекет басшысының Жаңғырту күн тәртібі – екінші республиканың қалыптасуы мен дамуына дер кезінде жасалған қадам. Негізгі Заңның новеллалары оның басым бөлігіне әсер етеді. Түзетулерге сәйкес Парламенттің рөлі күшейтілетінін, сондай-ақ басқарудың жаңа жүйесіне нақты көшу бекітілетінін атап өту маңызды. Көптеген саяси сәтте қазақстандықтар тікелей қатыса алады, референдумға дауыс беру – соның дәлелі, – деді сенатор.

Аймаққа жасаған сапары аясында депутаттар инклюзивті білім беру туралы заң жобасының орындалу және жүзеге асырылу барысына тоқталды. Мәселеге маңыз берген сенатор Ләззат Қалтаева Жаңа Қазақстан – еліміздің барлық тұрғыны үшін тең мүмкіндіктерге ие инклюзивті қоғам екенін атап өтті.

– Алдағы референдумда барлық қазақстандық өздерінің қатысуымен жаңа Қазақстанның біздің өміріміз бен қоғамымыздың ақиқатына айналуы үшін өз таңдауын жасауға мүмкіндік алады, – дейді депутат Ләззат Қалтаева.

Сондай-ақ Парламент Сенатының депутаты Жанболат Жөргенбаев Қарасай аудандық ауруханасының қызметкерлерімен кездесті. Ол жүздесу барысында Конституцияға енгізілетін әрі еліміздің қазіргі кездегі саяси жүйесін өзгертуді көздейтін өзгерістер мен толықтырулар туралы айтты. Сенатор қоғамдық-саяси саладағы өзгерістер экономиканың дамуына, халықтың тұрмысының жақсаруына да әсер ететінін атап өте келе, алдағы референдумның маңызына тоқталып, бүкілхалықтық референдумға халықтың жоғары деңгейде қатысатынына сенім білдірді.

Ал сенатор Сұлтан Дүйсембинов Талдықорған қаласының мәслихат депутаттарымен және мекеме басшыларымен кездесті. Депутат конституциялық реформаның негізгі бағыттарына тоқталып, азаматтардың көкейкесті сауалдарына жауап берді.

– Мемлекет басшысы жақында өткен Қазақстан халқы Ассамблеясының кезекті сессиясында Негізгі Заңымыз – Конституцияға енгізілген өзгерістер мен толықтырулар жалпыхалықтық референдумда қабылданатынын айтты. Ал бұл – еліміздің болашағына алаңдаушылықтан жасалған қадам. Әлемдік геосаяси жағдай ушығып тұрған қазіргі кезеңде ұлттық тұтастық, мемлекеттік бірлік, әсіресе халқымыздың қолдауы ауадай қажет. Сондықтан Мемлекет басшысы осындай маңызды шешімді референдум арқылы қабылдауды ұсынды, – деді сенатор Сұлтан Дүйсембинов.

Алматы облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз