Аймақтар • 17 Мамыр, 2022

Лай көшкіні балдырған қыздың өмірін қиып кетті

Апаттың айтып келмейтіні анық. Күні кеше Текелі қаласында лай көшкіні болып, табиғи жағдайдың соңы ауыр қазамен аяқталды.

Қалмаханбет МҰҚАМЕТҚАЛИ

Жексенбі күні түс мезетінде болған лай көшкіні қаланың Қонаев көшесіндегі 5 үйді бірден басып қалған. Бір үй толығымен батпақ үйіндісінің астында қалып, жермен жексен болды. Өкінішке қарай, дәл осы үйдегі 5 жасар балдырған қыз құлаған үйдің астында қалып, шейіт кетті.

Төтенше оқиға туралы хабар жетісімен Текеліге Алматы облысы әкімінің бірінші орынбасары Ләззат Тұрлашов бастаған топ жедел жетті. Оның жетекшілігімен облыстық жедел штаб құрылды. Штаб жұмысына облыстық төтенше жағдай департаментінің басшылығы, облыс әкімінің орынбасары Батыржан Байжұманов және облыстық полиция департаментінің қызметкерлері жұмылдырылды. Мамандар адамдарды қауіпсіз жерге көшіріп, із-түзсіз жоғалған баланы іздеуге барын салды. Із кесуге иісшіл ит те қосылды. Алайда 6 сағат бойы жүрген іздеу жұмысынан соң 2016 жылы туған қыздың денесі табылды. Шетінеген балдырғанды көшкіннен құлаған үй басып қалған екен.

– Өткен жексенбі күні түс кезінде Текеліде лай көшкіні болды. 5 үй батпақ үйіндісінің астында қалып, соның ішінде бір үй толығымен қираған. Осы үйдегі 5 жасар балдырған із-түзсіз жоғалып, оқиға орнында учаскелерге бөлініп, арнайы мамандар мен құтқарушылар жұмыс істеді. Іздеу жұмысына кинологиялық қызметті жұмылдырғаннан кейін үйінді арасынан қыздың денесі табылды. Қазір лай көшкінінен зардап шеккен отбасылар уақытша мекенге орналастырылды және басқа да қажетті көмек көрсетілуде. Оқиғаның нақты себептері анықталып жатыр. Соның нәтижесі бойынша тиісті шаралар қабылданатын болады, – деді бізге облыс әкімінің бірінші орынбасары, төтенше жағдай жөніндегі арнайы штаб жетекшісі Ләззат Тұрлашов.

Алматы облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз