Бүгінде орталықтағы аналар мен сәбилер, жалпы емделушілер облыстағы перзентханаларға жеткізіліп, тиісті емдерін алуда. Оқыс оқиға салдарынан үш адам қаза болған, түрлі жарақат алған жеті адам облыстық және қалалық ауруханаларда емделуде.
Облыстық қоғамдық денсаулық басқармасының басшысы Марат Пашимов оқыс оқиға кезіндегі қиын жағдайда перзентхана ұжымы бір кісідей жұмылып, дәрігерлік міндеттерін атқарғанын, үрейге бой алдырмай тиісті көмектерін көрсетіп, емделушілерді көшіруге атсалысқанын айтады. «Облыс әкімі Өмірзақ Шөкеев оқиға орнына шұғыл жетіп, тиісті тапсырмалар берді. Денсаулық сақтау министрі дер кезінде назар аударып, нұсқаулықтар берді. Жарылыс болған маңайдағы үйлердің тұрғындары, тіпті сол арадан өтіп бара жатқан адамдар да қолұшын беруге тырысты. Өз басым мұны мейірімділіктің, бірліктің бір көрінісі деп қабылдадым. Бүгінде облыс және қаладағы жүкті әйелдерге қызмет көрсетуде ешқандай кедергі жоқ. Облыс орталығындағы, қаладағы және аудандардағы перзентханалар мен ауруханалар толыққанды жұмыс істеуде», деді оқыс оқиғаға байланысты күні кеше арнайы брифинг өткізген облыстық қоғамдық денсаулық басқармасының басшысы. Сенбі күні болған оқыс оқиғаны ретімен баяндасақ...
Қалалық төтенше жағдайлар департаменті баспасөз қызметінің мәліметінше, өрт туралы хабарлама күндізгі сағат 11:36-да түскен. Өрт сөндірушілер жеткен кезде жарылыс салдарынан «Ауруханааралық 138-дәріхана» ЖШС-не қарасты 2 қабатты жеке тұрғын үйден өрт шыққаны анықталған. Ғимараттың жалпы ауданы 360 шаршы метр, қабырғалары кірпіштен, шатыры гофр картонмен қапталған. Жарылыс салдарынан 130 шаршы метр аумақта ғимарат ішінара опырылып, 5 қабатты тұрғын үйдің жанындағы пәтердің балконы мен терезелері, 7 автокөлік зақымданған. Жалынды ауыздықтауға департаменттің 37 қызметкері және 9 техника жұмылдырылған. Өрт сағат 12:06-да сөндірілді. Төтенше жағдайлар департаментінің қызметкерлері оқиға орнынан жанып кеткен ер адамның мәйітін тапты. Оқиға орнына сондай-ақ Шымкент қаласының әкімі Мұрат Әйтенов, полиция департаментінің басшылығы жедел жеткен. Жарылыс болған ауруханааралық дәріхана ғимаратының толық жойылғаны, онда тұзды ерітінді өндірілетіні анықталып отыр.
Жарылыс болған ғимараттың перинаталдық орталыққа еш қатысы жоқ болып шықты. Дегенмен өкінішке қарай, жарылыстың күшті толқынынан дәріхана маңайындағы перзентханаға да зардап тиген. Әсіресе бірінші қабаттағы жансақтау бөліміне. Терезелері қирап, жабдықтар істен шыққан. Жарылыс болған ғимараттың жанындағы перзентханадан ана мен сәбилер, медицина қызметкерлері жедел басқа ғимаратқа көшірілді. Қалалық төтенше жағдайлар департаментінің бастығы Мадияр Жақсыбаев жарылыс болған ғимараттың қасындағы бес қабатты тұрғын үйдің 20-ға жуық тұрғыны да қауіпсіз жерге көшірілгенін мәлім етті. «Олардың арасында зардап шеккендер жоқ. Десе де оқиға орнында жедел құтқару жасағы мен кинологтер жұмыс істеп жатыр. Қалалық әкімдікте штаб құрылып, арнайы техникалармен тазалау жұмыстарын жүргізу шаралары басталды. Жарылыс болған ғимараттың иесі іште жұмысшылар болмағанын айтады. Бәрі демалыста болған. Сонымен қатар ғимаратта екі тоннадай сутегі асқын тотығы сақталғанын жеткізді. Бұл – фурациллин мен глюкоза шығаратын сұйықтық. Жарылысқа осы сұйықтық себеп болуы мүмкін деген болжам бар. Десе де оның нақтысы тексеру барысында анықталады. Газдың кесірінен жарылыс болуы мүмкін деген болжам қарастырылып жатқан жоқ», деді қалалық ТЖД бастығы. Сондай-ақ департамент бастығының айтуына қарағанда, жарылыс салдарынан екі қабатты ғимараттың 55 шаршы метрі өртеніп, 130 шаршы метрі құлаған. Ал оқиға орнынан табылған ер адам 1979 жылы туған перзентхананың күзетшісі екені анықталды. Кейінірек жарылыстан жалпы үш адамның қаза болғаны жария етілді. «Өкінішке қарай, 1979 жылы туған күзетші, 1980 жылы туған жұмысшы және 18 күн бұрын туған сәби қайғылы оқиғаның құрбаны болды. Қаза тапқандардың отбасыларына көңіл айтамыз. Зардап шеккендерге көмек көрсету және осы қайғылы оқиғаны тергеу үшін ведомство барлық қажетті шараны қабылдайды», деп хабарлады Денсаулық сақтау министрлігі. Сондай-ақ Денсаулық сақтау министрі Ажар Ғиният қаза тапқандардың отбасыларына көңіл айтты. «Дәл қазіргі уақытта жағдай Денсаулық сақтау министрлігінің бақылауында тұр. Зардап шеккендерді қаланың медициналық ұйымдарында стационарлық жағдайда емдеу үшін барлық шара қабылдануда. Бұдан басқа Түркістан облысы бойынша жүкті және жаңа туған нәрестелерді бағыттауды ұйымдастыру және өзгерту бойынша жұмыстар шұғыл түрде жүзеге асырылуда», деп жазды Ажар Ғиният фейсбуктегі парақшасында.
Ал кешегі брифингте облыстық қоғамдық денсаулық басқармасының басшысы Марат Пашимов зардап шеккендерге көмек көрсетілетінін, перинаталдық орталық алдағы уақытта жұмысын жалғастыратынын жеткізді. «Бұл жағдай облыс әкімінің бақылауында. Жарылыс салдарынан жарақат алғандардың жағдайы тұрақты. Нақтылай кетсек, жарақат алған жеті адамның 5-еуі облыстық перинаталдық орталықта жұмыс істейді. Яғни төртеуі кіші буын қызметкерлері, бір медбике. Орталық аумағында күрделі жөндеу жұмыстары жүргізіліп жатқан болатын. Жарақат алғандардың екеуі сол жердегі жұмысшы. Барлығының жағдайы тұрақты. Оларға А.Сызғанов атындағы ҰҒХО дәрігерлері кеңес беріп, психологтер тобының жұмысы ұйымдастырылған», деді басқарма басшысы. Сондай-ақ брифингте Денсаулық сақтау министрлігі Ана мен бала денсаулығын қорғау департаментінің директоры Мағрипа Ембергенова перзентханаларда болып, емделушілерінің жағдайын білгенін, оларға барлық жағдай жасалғанын мәлім етті.
Айта кетелік, Шымкент қалалық полиция департаменті бастығының бірінші орынбасары Мұрат Алтаев пен қалалық полиция департаменті тергеу басқармасының бастығы Дәулеткелді Әбдірамановтың хабарлауынша, жедел тергеу тобы құрылып, сотқа дейінгі тергеп-тексеру жұмыстары басталған. Аталған оқиғаға орай полиция департаментінде Қылмыстық кодекстің 292-бабына сәйкес қылмыстық іс қозғалған. Өрт қауіпсіздігі ережесін сақтамаған азаматтардың қылмыстық әрекетін әшкерелейтін бұл бап бойынша екі жылдан жеті жылға дейінгі аралықта бас бостандығынан айыру көзделген.
ШЫМКЕНТ