Аймақтар • 24 Мамыр, 2022

«Жас дарын» байқауы өтті

542 рет
көрсетілді
4 мин
оқу үшін

Балалар жылы аясында ұйымдастырылған облыстық байқауға декоративті-қолдан­балы өнермен айналысып жүрген 11-17 жас аралығындағы алпысқа жуық оқушы қатысты. Көрмеге он саусағынан өнер тамған жас өскін дарындардың қолынан шыққан қолөнер туындылары қойылды.

«Жас дарын» байқауы өтті

Жас авторлардың таңдаған тақырыбына, көркемдік талғамы мен ой еркіндігіне, суреткерлік шеберлігіне таңғалмасқа болмайды. Күрделі композицияға құрылған кейбір дүниелер тіпті бала емес, құдды тәжірибелі кәсіби шебер жасап шыққандай ерекше көз тартады. Жастар шы­ғармашылығындағы жаңа­шыл­дықты қазылар алқасының мүшелері де атап өтіп, дарынды балалардың ішінде келешегінен зор үміт күттіретін шеберлердің аз емес екенін айтты.

– Жас қолөнершілердің шы­ғармашылыққа қасаң тұрғыда емес, кең ойлап, креативті көз­қараспен жол салып жатқаны байқалады. Кейбір балғындардың жасаған дүниесі бізді де тәнті етті. Бұл байқауға қатысқан оқушылардың бәрі болашақта су­ретші болмауы мүмкін. Бір­ақ кемелі толысқан кәсіби маман болып қалыптасары анық. Жалпы, Мемлекет басшысы Қасым-Жомарт Тоқаевтың 2022 жылды балалар жылы деп жария­лап, қоғамды ұрпақ тәрбиесіне, баланың қабілет-дарынын ұш­тау, дамыту, ынталандыру мәсе­лелеріне бағыттағаны өте құп­тарлық бастама болды, – деді Қазақстан суретшілер одағының мүшесі Александр Захарченков.

Байқауға шалғай ауылдардан келген бала шеберлердің де қолөнерге деген талабы мықты. Мысалы, Амангелді ауылындағы жалпы білім беретін мектептің 8-сынып оқушысы Айша Әбіл­ғазы «Қыз жасауы» атты композициясын алып келіпті.

– Амангелдідегі «Шұғыла» балалар және жасөспірімдер шығармашылық орталығының шәкіртімін. Ісмерлікпен айналысып жүргеніме 3 жыл болды. Қолөнер үйірмесіне 25-30 шақты қыз бала бармыз. Алдымен аудандық байқауға қатысып, бас жүлдені ұтып алдым. Енді міне, облыстық байқаудың жүлдесінен де үміттіміз. «Жас дарынға» 2019 жылы да келіп, екінші орынға ие болғанмын. Мұнда әкелген композициямыз қазақтың қыз ұзату рәсімінде пайдаланылатын 8 түрлі тұрмыстық бұйымнан тұрады. Ұстазым Нұрсұлу Мей­рам­бекқызының көмегімен 5-6 айдың ішінде жасап шықтым, – деді жас дарын.

Айшаны конкурсқа алып келген «Шұғыла» балалар және жасөспірімдер шығармашылық орталығының жетекшісі Ербол Қойшыбаевтың айтуынша, Аман­гелді ауданында балаларға арналған бес бағытты қамтитын 36 үйірме жұмыс істейді екен.

– Облыстық «Жас дарын» байқауы 8 номинация бойынша өтіп жатыр. Сол 8 аталымға бір-бірден сегіз жұмыс әкеліп отырмыз. Аудандық кезеңде жеңіп шыққан екі шәкіртіміз қатысып жатыр. Мәселен, бірінші номинацияға ою-өрнекпен әшекейленген ұлт­тық киім үлгілерін алып келді. Мұны да өзіміздің тігін үйірмесіне қатысатын шәкірттеріміз тіккен. Ауылда ұл балаларға қолөнерден сабақ беретін Жасұлан Нұрбаев деген ағамыз бар. Көрме-байқауға сол кісінің шәкірттері киізүйге ұқсатып жасаған болашақтағы за­манауи мектептің макетін де әкеп отырмыз, – деді орталық басшысы.

Байқауда сәндік-қолданбалы өнер мен көркем-эстетикалық бағыттағы шығармашылық үйір­ме­лерге қатысатын балалар­дың 104 жұмысы көпшілік назарына ұсынылды. Жас шеберлердің ұлттық ою-өрнекпен безендіріл­ген бұйымдары көбіне тоқыма, ағаш, иттемір, сүйек, тері, саз, сабан қағаздан жасалған.

Балалар байқауы облыстық білім басқармасына қарасты пси­хологиялық қолдау және қосым­ша білім беру өңірлік орталы­ғының мұрындық болуымен өтті.

– Былтыр осы байқаудың республикалық кезеңінде Бейім­бет Майлин, Жітіқара, Қостанай ауданының оқушылары жеңімпаз атанды. Биыл да мықтылар қа­тарынан көрінеміз деп ойлаймыз. Өйткені байқаудың 7 аталымына компьютерлік дизайн деген тағы бір номинация қостық. Сөйтіп, сегіз бағыт бойынша жұ­мыстар ұсынылып отыр. Өңірде көркем-эстетикалық бағыттағы үйірмелерде 3,5 мыңнан астам бала тәлім алады. Бұл байқау сол үйірмелердің жұмыс нәтижелерін қорытындылау мақсатында ұйым­­­дастырылды, – дейді өңір­­лік ор­талықтың директоры Елена Петренко.

Байқау барысында өңірге белгілі қолөнер шеберлері мен кәсіби суретшілер арнайы шебер­лік сағаттарын өткізді. «Жас дарын» конкурсында дараланған жеңімпаздардың шығармалары алдағы 12-14 қазанда өтетін «Ал­тын қазына» республикалық көр­месіне қойылады.

 

Қостанай облысы

Соңғы жаңалықтар

Су үнемдейтін қондырғы

Технология • Кеше