Қарағандылық баланы диетамен ұстау үшін жылына 2,2 млн. теңге қажет

Қарағанды қаласының 5 жасар тұрғыны Бейбіт Бекназаров генетикалық ауру түрлерінің ішіндегі ең сирек кездесетініне (гомоцистинурия) душар болған еліміздегі жалғыз бала. Оның ми және жүрек-қан тамырларының жұмысына кәдімгі тағамдар кері әсерін тигізуі әбден мүмкін. Бұл туралы «Экспресс К» хабарлады. Баланы аман сақтаудың бір жолы – оны өмір бойы диета бойынша қоректендіру. Бірақ ол үшін мол қаржы керек. Бейбіт - отбасының төртінші перзенті. Оған бұл диагноз 2014 жылдың ақпанында АҚШ-тың Чикаго қаласындағы диагностикалық зертханада қойылған. Қарағанды облысының бас балалар дәрігері Наталья Дүйсембаеваның айтуынша, әзірге балаға диагноз қойылғанымен, оның емі табылмай отыр. Баланы диета бойынша тамақтандыру үшін арнайы аминқышқылмен байытылған ұнтақ және мейілінше емдік қасиеттері мол азық-түліктер керек. Ал мұндай қоректің бір құтысы 80 мың теңге тұрады. Демек, Бейбіттің диеталық тұрғыда тамақтандыру үшін 2,2 млн. теңге қажет. Осыған байланысты Қарағанды облыстық денсаулық сақтау басқармасы аталмыш облыстың депутаттарына өтінішпен шықты. Бұл өтініште Бейбітке қажетті диеталық тағамды халыққа тегін берілуі тиіс дәрі-дәрмектердің тізіміне енгізу сұралған. Бұл хабарды естіген облыстық мәслихат депутаттары жедел түрде үн қатты. Депутаттар осы жағдайға байланысты облыстық мәслихаттың кезектен тыс сессиясын шақырып, тиісті құжаттарға өзгертулер енгізді. Нәтижесінде Бейбіт өмір бойы ағзасына қажетті, құны қымбат диеталық тағаммен қамтамасыз етілетін болды. Жолдыбай Базар. Дереккөз: «Экспресс К». Фото: Strongside.ru.