Айта кетерлігі, бұрын Мәшһүр Жүсіп оқулары тек облыстық деңгейде, яғни біздің аймақта ғана өткізіліп келген болатын. Республикалық деңгейде ұйымдастыру алғаш рет 2019 жылы қолға алынып, Павлодар қаласында елеусіздеу өткені бар. «Бұл ән бұрынғы әннен өзгерек» демекші, бұл шараның ауқымы кең, мазмұны бөлек. Шығармашыл жас өрендер додасын Қазақстан Республикасы Білім және ғылым министрлігі және «Дарын» республикалық ғылыми-практикалық орталығының қолдауымен ұйымдастырушы – Павлодар облысы білім беру басқармасының «Ертіс дарыны» өңірлік қосымша білім беру оқу-әдістемелік орталығы.
Сайысқа 10 облыстан, Нұр-Сұлтан, Алматы, Шымкент қалаларынан және 2 республикалық білім беру ұйымынан 58 үміткер қатысты. Павлодар облысы білім беру басқармасы тарапынан жүлдегерлерге тігілген жүлделер де осал болмады: бас жүлде иегерлеріне – ноутбук, І орынға – ұялы телефон, ІІ орынға – сымсыз құлаққап, ІІІ орынға – Power Bank қуаттау құрылғысы.
Республикалық Мәшһүр Жүсіп оқуларының Естай атындағы балалар музыка мектебінде өтуі, мектептің өнерлі балаларының қонақтарды күмбірлеген күймен қарсы алуы, шараға бастан-аяқ облыстық білім басқармасы басшысының міндетін атқарушы Ә.Әбенованың бас-көз болуы, Павлодар қаласындағы «Мәшһүр Жүсіп» қоры (президенті – Ертай Жүсіпов) тарапынан Мәшһүр Жүсіп шығармалары топтастырылған «Жетпіс бап» кітабының меймандарға сыйға тартылуы ғұлама бабамыздың мұрасын насихаттауды мақсат тұтқан шараның мән-маңызын асыра түскендей.
Шығармашыл өрендердің жұмысын саралаған қазылар алқасының құрамы төмендегідей: Қарлығаш Сарекенова (Л.Н.Гумилев атындағы Еуразия ұлттық университеті, ф.ғ.к.), ақын Серікзат Дүйсенғазы (Л.Н.Гумилев атындағы Еуразия ұлттық университеті, ф.ғ.к.), Мақсат Алпысбес (Л.Н.Гумилев атындағы Еуразия ұлттық университеті, т.ғ.д.), Ертай Жүсіпов (Торайғыров университеті, ф.ғ.к.), Айтмұхамет Тұрышев (Торайғыров университеті, ф. ғ.ф.к., профессор), Бақытгүл Қапасова (Торайғыров университеті, ф.ғ.к.), Майгүл Оразханова (Павлодар педагогикалық университеті, ф.ғ.к.), ақын Айбек Оралхан (Павлодар қаласының орталықтандырылған кітапханалар жүйесінің қызметкері, Қазақстан Республикасы Жазушылар одағының мүшесі), Ботакөз Құралқанова (Павлодар педагогикалық университеті, ф.ғ.к.), ақын-жазушы Серік Елікбай (Торайғыров университеті, ф.ғ.к.), Баянгүл Қожахметова (Торайғыров университеті, гуманитарлық ғылымдар магистрі).
– Мүшәйрада 15 жас дарынның өлеңдерін тыңдадық, олардың бәрі қазақ поэзиясының келешек өкілдері деп білемін. Сайыстың мақсаты – жас таланттардың талабын ұштау, жастарды тарихқа, шығармашылыққа, әдебиетке тәрбиелеу. Талантты балалар өсіп келе жатқанына көзіміз жетті. Алматыдан келген Дарын Бексұлтан деген өлең жазып қана қоймай, оны оқуы да ерекше екен. Қатысушылар арасында ұстаз көрген жас ақындар бар. Өлең дегеннің бәрі бірдей шыға бермейді. Орын алмай қалған баладан да мықты ақын шығады. Кей ақындардың өлеңдері кәсіби деңгейге көтерілген. Біз тіпті өздеріне өлең жазғызып та тексеріп көрдік, – ақын Серікзат Дүйсенғазы.
Айта кетерлігі, Мәшһүр Жүсіп оқулары аясында қазақ тілі мен әдебиеті пәні мұғалімдері үшін «Мәшһүртану мәселелері және оқушыларды әдеби оқуға дайындау әдістемесі» тақырыбында семинар ұйымдастырылып, қатысушыларға Л.Н.Гумилев атындағы Еуразия ұлттық университетінің оқытушысы, филология ғылымдарының кандидаты Қарлығаш Сарекенова және Торайғыров университетінің гуманитарлық ғылымдар магистрі Баянгүл Қожахметова әдістемелік дәріс оқыды.
Байқау соңында қатысушылар, жетекшілер және қазылар алқасының мүшелері Ескеліге сапар шегіп, Мәшһүр Жүсіп Көпейұлының рухына тәу етті.
Павлодар облысы,
Екібастұз қаласы
