Әлеуметтік жобаны Ақпарат және қоғамдық даму министрлігінің тапсырысы бойынша «Қазақстандық даму қауымдастығы» заңды тұлғалар бірлестігі жүзеге асырады. Жобаға еліміздің әр өңіріндегі жоғары сынып оқушылары, колледждер мен жоғары оқу орындарының студенттері қатыса алады.
«Жоба аясында Тәуелсіздік жылдарында жетістікке қол жеткізген қазақстандықтардың қатысуымен түрлі форматтағы іс-шаралар өткізілетін болады. Әр өңірде «Дарын» мемлекеттік жастар сыйлығы лауреаттарының қатысуымен нетворкинг және тәжірибе алмасу, пікірталас алаңдары құрылып, шеберлік сыныптары, семинар-тренингтер ұйымдастырылады», деді «Тәуелсіздік ұрпақтарының» мән-мақсатымен таныстырған жоба менеджері Эльвира Сәрсенәлиева.
Қыркүйекте «Тәуелсіздік ұрпақтары» жобасы аясында Нұр-Сұлтан, Шымкент, Алматы қалаларында «Болашақ Қазақстан – менің көзіммен» атты ТEDx конференциясы өтеді.
«Бұл іс-шара аясында жастардың ең белсенді self made өкілдері мемлекеттің дамуы мен маңызды әлеуметтік мәселелерді шешуге қатысты өз көзқарастарын ұсынады», деп атап өтті Э.Сәрсенәлиева.
Жоба жетекшісінің айтуынша, әрбір ТEDx конференциядан кейін жастардың бір-бірімен танысуына, тәжірибе алмасуына, олардың бастамаларын талқылауға мүмкіндік беретін нетворкинг кездесулер ұйымдастырылмақ.
Сондай-ақ «Қазақстандық даму қауымдастығы» ЗТБ Жастар ресурстық орталықтарымен бірлесіп, «Шешендік өнер», «Қаржылық сауаттылық», «Тайм менеджмент», «Креативті индустрия», «Блог жүргізу», «Саламатты өмір салты» тақырыптарындағы офлайн шеберлік сағаттарын өткізбек.
Сонымен қатар жоба ұйымдастырушылары қазақстандық талантты жастардың қатысуымен бейнеподкасттарды әзірлейтін болады.
«Тәуелсіздік ұрпақтары» жобасы туралы толық ақпаратты https://www.instagram.com/p/CdcatbPtblv/?igshid= MDJmNzVkMjY сілтеме арқылы алуға болады.