Аймақтар • 26 Мамыр, 2022

Шайыр «илеген» шебер

Атыраулық Илона Ким екі мамандықты меңгерген. Бірі – ағылшын тілі пәнінің мұғалімі, екіншісі – туризм менеджері. Шетелдік компанияда 12 жылдық еңбек өтілі бар. Алайда аңсары қолөнерге ауған шебер шайырдан түрлі бұйым жасап жүр.

Жолдасбек КӨШЕРБАЙҰЛЫ

– Осы өңірде дүниеге келіп, осында еңбек жолымды бастадым. Бала кезімнен қолөнер бұйымдарына қызығатын едім. Сол қызығушылық ақыры шетелдік компаниядағы тәуір жұмысымды тастауға мәжбүр етті. Бастапқыда сурет салып жүрдім. Кейін шайырды «илеп», түрлі бұйым мен ойыншықтар жасауға көштім. Өйткені өзгенің жасаған нәрсесін қайталағым келмейді. Шикізат ретінде Ресейде шығарылған сұйық эпоксидті шайырды пайдаланамын. Оның 1 литрі 14 мың теңге тұрады, – дейді Илона Ким.

Оның шебер қолынан үйде пайдаланатын сəндік бұйымдар, сувенирлер, сағат пен картиналар туындады. Дәмі тіл үйіретін тәтті конфеттер салуға арналған ыдысты да жасады. Ал жаңа жыл қарсаңында шыршаға ілетін түрлі ойыншықты дайындады. Бәрі – шайырдан жасалған өнім.

– Алдымен шайырды 10 минуттай араластырып, былайша айтқанда, иін қандыра «илеймін». Сұйық шайыр 20-30 минутта қатып қалады. Сол себептен, ойға алған бұйымды тез жасау керек. Қатқан шайырды қайта балқыта алмайсың. Пішінге келтіру, кептіру, бояу секілді жұмыстарын қосқанда, бір бұйымды үш күнде дайындап жүрмін, – дейді шайыр «илейтін» шебер.

Оған еліміздің Нұр-Сұлтан мен Алматы қалаларыннан, Көкшетау мен Қостанай өңірлерінен тапсырыстар түсіп тұрады. Мәселен, Көкшетау қаласынан үш аптада 70 ойыншықты жасауға тапсырыс түскен. Бұл ойыншықтар келісілген мерзімде дайындалып, тапсырыс берушіге жіберілген.

Атырау облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз