Мәдениет және спорт министрлігіне қарасты Спортты дамыту дирекциясының мәліметі бойынша, жарыстың алғашқы күні техникалық бағдарламада өнер көрсеткен қазақстандық спортшылар 2 жүлдеге қол жеткізсе, келесі күнгі жарыста осы игі дәстүрді лайықты жалғастырып, тағы 3 рет тұғыр биігіне көтерілді.
Байрақты бәсекенің бірінші жарыс күнінде техникалық бағдарламада үздік үштіктің қатарынан көрінген Қазақстанның қыздар командасы (8 спортшы) еркін жаттығуда нәтижесін жақсарта түсті. Бұл жолы «Моана» анимациялық фильміндегі Vaiana әніне өнер көрсетіп, күміс жүлдегер атанды (81,5333 балл). Израиль құрамасы 1-ші, Словакия 3-орынға жайғасты. Осыдан біраз күн бұрын Аустралияда виртуалды форматта өткен жарыста төрешілер біздің спортшыларға дәл осы бағдарлама (ол кезде де жерлестеріміз Vaiana әніне билеген еді) үшін 79,6000 ұпай берген болатын.
Эдуард Ким мен Жаклин Якимова жұбы техникалық жаттығуына Chicago фильміндегі All that Jazz әнін таңдап, шеберліктерін паш етті. Нәтижесінде, төрешілерден 78,2740 ұпай алып, қола жүлдеге ие болды. Бұл сында испаниялық Эмма Гарсия мен Пау Рибес топ жарса (83,3138 балл), күміс жүлдеге америкалық Клаудия Колетти мен Кеннет Годе иелік етті.
Сонымен қатар ерлер арасындағы жекелей сында Эдуард Ким 2019 жылғы «Евровидения» жеңімпазы Дункан Лоуренстің Arcade әніне өнер көрсетіп, қола жүлдеге ие болды. Биыл алғаш рет ел намысын осындай үлкен жарыста қорғаған Эдуардтың «Махаббат тарихы» деп аталатын бағдарламасына төрешілер 74,8478 балл берді. Ал командалық сында Қазақстан құрамасы Олена Уутайдың «Табиғат үні» музыкасын таңдап, бар шеберлігін көрсете алды. Нәтижесінде, АҚШ пен Израильден кейінгі 3-орынға тұрақтады.
Финалдың соңғы күні аралас командалардың еркін комбинация сайысында Қазақстан (10 спортшы) «Испан биі» нөмерімен қола медальға қол жеткізді (80,8000). Жарыс қожайыны Грекия құрамасы алтын, Израиль күміс медаль жеңіп алды.
Бұл суперфиналда 4 алтын, 1 күміс жүлдесі бар Испания спортшылары жеңіске жетсе, Аустрия құрамасы – екінші (4 алтын), АҚШ – үшінші (2 алтын, 3 күміс, 4 қола) сатыдан көрінді. Қазақстан құрамасы 1 күміс, 4 қола жүлдемен 8-орынға табан тіреді.
