Оқыту базасы толық қамтылған бұл жоғары оқу орны студентке тәжірибелік бағыт-бағдар бере отырып, болашақ мамандардың білімін шыңдай түседі. Әуелі айта кетерлігі, университет әлемдік деңгейдегі жетекші кәсіпорындармен тығыз байланыста, бір алаңда жұмыс істейді.
– Президенттің техникалық білім беруге көңіл бөлгені бізді қуантады. Университетіміздің бұл бағытта атқарған шаруасы қыруар. Біздің түлектеріміз еліміздің ғана емес, әлемнің үлкен кәсіпорындарында қызмет етіп жүр. Оқытушылар да тәжірибелі, білімді, – дейді ШҚТУ ректорының міндетін атқарушы Сәуле Жәдігерқызы.
Өскемен өндірісті қала болғандықтан, техникалық мамандардың біліктілігі мен білімін арттыруға мүмкіндік мол. Мәселен, «ТМК» – әлемдегі ең ірі титан өндіруші кәсіпорын. Титанның әлемдік нарығындағы үлесі – 17 пайыз. Бұл – аз көрсеткіш емес. Сонымен қатар университет оқытушылары мен студенттері «Казцинк» ЖШС-мен де иық тірестіре жұмыс істейді. Аталған компания мырыш өндіру және оны өткізу нарығында 30 пайыздық үлеске ие. Яғни әлемдегі ең ірі жеткізуші. «ҮМЗ» – байытылған уран, сирек кездесетін бериллий, тантал сынды металдарды жеткізумен айналысатын ең ірі компаниялардың бірі. Тағы бір ірі де бірегей компания – «Kazminerals» ЖШС. Бұл кәсіпорын мыс, қорғасын, алтын өндіру мен қайта өңдеуге бейінделген.
Алтын қайнатып, мыс сапыратын кәсіпорынның қайнауында шыныққан студенттердің болашағы зор. Диплом қолға тиген соң, жұмыс іздеп сандалмасы рас. Техникалық университетті тәмамдаған мамандарға еңбек нарығында сұраныс жоғары. Нақты айтсақ, жұмыспен қамту көрсеткіші 94 пайызды құрайды. Университеттің білім беру бағдарламаларын жұмыс берушілер, сарапшылар жоғары бағалайды. «Атамекен» ұлттық кәсіпкерлік палатасы ұсынған өлшемшарттар бойынша жоғары оқу орны бағдарламаларының 62 пайызы еліміздегі ең үздік бестікке кіреді. Білім бағдарламасының сапасын халықаралық тәуелсіз агенттіктер растаған. Бағдарлама еуропалық лейблге ие. Яғни ШҚТУ дипломдары Еуропада да мойындалады.
Осындай жетістіктерді бір деп қойыңыз. Екіншіден, университетте жоғары деңгейде зерттеулер жүргізуге мүмкіндік беретін үш деңгейлі инновациялық ғылыми-зерттеу экожүйесі қалыптасқан. Тарқата айтсақ, бірінші деңгей – білім және зерттеу міндеттері, базалық факультеттер мен мектептердің оқу зертханасы. Екінші деңгей – қолданбалы ғылыми-зерттеу міндеттері және келісімшарттық зерттеу. Үшінші деңгей – тау-кен металлургия саласындағы академиялық артықшылық орталығы. Оның базасында металлургия, пайдалы қазбаларды өңдеу және байыту, материалтану саласында іргелі және қолданбалы ғылыми-зерттеулер жүргізіледі.
Университетте жалпы құны 3 млрд теңгеге жуық 5 мыңнан астам ғылыми-зерттеу және зертханалық жабдықтармен қамтылған ғылыми-зерттеу базасы құрылған.
Қазір жүргізіліп жатқан зерттеулердің негізгі бағыттары – пайдалы қазбалар кен орындарын іздеу және болжаудың жаңа технологиялары, дәстүрлі емес зеңбірек түрлерінің перспективаларын бағалау. Бұл бағыт-
тағы серіктестер – Колорадо тау-кен мектебі (АҚШ), Акита университеті (Жапония), Геология және минералогия институты (Ресей), «Қазгеоақпарат» республикалық геологиялық ақпарат орталығы. Медицинаға арналған заманауи материалдар мен материалтану зерттеу жұмыстары бойынша серіктестер – академик Н.Батпенов атындағы травматология және ортопедия ұлттық ғылыми орталығы, Семей медицина университеті, Украинаның жақ-бет хирургиясы қауымдастығы, «Казмедбиотех» ЖШС.
Университеттің үшінші артықшылығы – әлемнің түкпір-түкпірінен келген жоғары санатты мамандар дәріс оқиды, практикалық зерттеулер жүргізеді. Жыл сайын 60-тан аса шетелдік ғалымды шақыра отырып, студенттердің жұмыс істеу қабілеттерін арттырады. Белгілі бағыттарда Еуропа, Ұлыбритания, Аустралия, АҚШ, Жапония, ТМД елдерінен келген ғалымдар дәріс оқиды. Олардың 20 пайыздан астамы – серіктес кәсіпорындардың жетекші мамандары.
ШҚТУ әлемнің жетекші техникалық жоғары оқу орындарымен бірлесіп қосдипломды бағдарламаны да іске асырып жатыр. Тоқсан ауыз сөздің тобықтай түйіні – техникалық университетке түскен түлектер ертеңгі күні жұмыссыз қалмайды.
Шығыс Қазақстан облысы
