Жұмыла көтерген жүк жеңіл

Жұмыла көтерген жүк жеңіл – дейді Батыс Қазақстан облыстық Қазақстан халқы Ассамблеясының хатшылық  меңгерушісі Ғайса ҚАПАҚОВ

Ынтымағы мен достығы жарасқан, тату-тәтті тірлігі мен бірлігі бұзылмаған өңірлер­­­дің бірі – Ақжайық. Мұндағы жылышырайлы этносаралық қарым-қатынастар тұтастай алғанда облыс экономикасы мен мәдениетінің одан әрі өркендей түсуіне оң әсерін тигізуде. Жеткен жетістіктерге Батыс Қазақстан облыстық Қазақстан халқы Ассамблеясының қосқан үлесі де мол. Сессия қарсаңында Ғ.Х.Қапақовпен болған әңгіме осындай бағытта өрбіді. – Ғайса Хамидоллаұлы, бүгінгі таңда Батыс Қа­зақстан облысының аума­ғындағы Ассам­блея­ның қазіргі тыныс-тір­шілігі туралы не айтар едіңіз? – Алдымен айтарым, облыс­тық Ассамблея – бұл халық шаруа­шы­лы­ғының әртүрлі саласында жемісті ең­бек етіп жүр­ген елге танымал отандас­тарымыз. Бұған қоса 22 адамнан тұра­тын облыстық Ассамблея кеңесі және бар. Сол сияқты Ассамблея жанынан құрылған ақсақалдар кеңесі, аналар кеңесі, ғылыми-са­раптамалық кеңес, қоғаммен байланыс жөніндегі кеңес және Ассамблеяның жас­тар қанаты жұмыс істейді. Осы құрылымдарға қоса, біздің облыс аумағында бүгінгі таңда 33 этномәдени бірлестік Жайық жұртының ынтымағын нығай­тып, ырысын молайтуға ұдайы мүд­делілік танытып жұмыс істеуде. Жаңағы 33 этномәдени отау­дың 15-і заңды тұлға ретін­де тіркелген. Ал Орал қала­сы мен Зеленов, Теректі, Шыңғыр­лау, Тасқала, Ақжайық аудан­дарындағы этномәдени бірлес­тіктер қоғамдық ұйым ретінде жұмыс істеуде. Қазіргі кезде әрбір ауданда аудан әкімдігінің басқаруымен ассамблея кеңестері құрылды. Сонымен қатар, 160-тан аса қоғамдық келісім кеңесі құрылып, ассамблея жұмысына жаңадан 1800-ден астам белсенді азамат тартылуда. Және бір атап өтер жайт, мектептерде, жоғары және арнаулы орта оқу орындарында достық клубтары құрылып, бұл бағыттағы жұмыстарға қазірдің өзінде 4 мыңнан астам қыз-жігіт жұмылдырылды. Жақында біздің этнобір­лес­тіктер өздерінің есепті жиналыс­тарын өткізіп, таяу болашаққа арналған межелі жұмыс жоспарларын бекітті. – Сіздің ойыңызша, Қаза­қ­стан халқы Ассамблеясының Ақжайық аймағындағы құры­лымының алдында қазіргі кезде қандай келелі міндеттер тұр? – Қазақстан халқы Ассам­блеясының ХХ сессиясында Ел­­басы Ассамблеяның басты міндеті – қоғамдық келісім деп атап көрсетті. Ал этносаралық қа­рым-қатынас сан қырлы жұмыс­тардың бір бөлігі екені белгілі. Ассамблеяның негізгі бағыттарын айқындайтын құжат ретінде 2013 жылдың маусым айында өткен облыстық сессияда облыстық Ассамблеяның 2020 жылға дейін даму стратегиясы қабылданды. Сондай-ақ, осы сессияда облыстық Ассамблеяның атқарған қызметіне тиісті талдаулар мен сараптамалар жасалып, алда тұрған міндеттер айқындалды. – Елбасы «Мемлекеттік тіл отан­даста­рымыздың ынты­мағын ны­ғайта түсетін фак­тор­­­ға айналуы тиіс» деген бола­тын. Осы орайда мем­лекеттік тіл­ді меңгеруге ден қой­ған отандастарымыз жөнінде айта кетсеңіз. – Тіл – Ассамблеяның күн тәртібінде тұрған басты мәсе­лелердің бірі. Былтыр осы мә­се­леге арнап Ассамблеяның кеңейтілген кеңесі өткізілді. Сонда бұған дейін орын алған кемшіліктердің басын ашып, алдағы істелетін жұмыстар туралы қаулы қабылданды. Енді, міне, соның алғашқы нәтижелері де көріне бастады. Ал қазақ тілінде еркін сөй­лейтін әртүрлі этнос өкілдеріне келер болсақ, олар ұлты қазақ болса да, өз ана тілінде сөйлей алмайтын кейбір бауырларымыз үшін үлгі тұтар тұлғалар деп есептеймін. Мемлекеттік тілде әдеби шығарма жазатын отандасымыз, чешен халқының өкілі Мұқ­тар Бокаев аға­мыз жүр­г­ен­ жерінде өз ұлтының қазақ хал­қынан көрген жақсылығын жыр қылып айтудан жалыққан емес. Ұлы Абайдың тілінде сөй­леймін деп ұмтылып жүрген азаматтардың бірі – жергілікті татар этномәдени бірлестігінің төрағасы Ришат Хайруллин, қазақ тілін үйренуге ынта-ықыласы ерекше отандасымыздың бірі – «Вайнах» чешен-ингуш этно­­­бір­лестігінің төрағасы Данил­бек Саратов. Мемлекеттік тілге құрмет жөнінен облыстық Ассамблеяның жастар қанатының жетекшісі Игорь Спиридонов – замандастарына өнеге болып жүрген жастардың бірі. Қазақ тілінде жатық сөйлей­тін азаматтары­мыздың бірі – әзер­байжан этномәдени ұйы­мы­ның төрағасы Наджаф Ма­медов, украин этномәдени ұйы­мының мүшесі Ирина Жилик, белорус этномәдени ұйымы­ның мүшесі Ольга Рапацкая. Осы мысалдардан-ақ аңғарған шығарсыз, «түрі басқа бол­ғаны­мен, тілегі бір, жүзі басқа бол­ға­нымен, жүрегі бір» отандас­тарымыздың мемлекеттік тілді үйренуге деген құл­шы­нысы жыл өткен сайын арта түсуде. Мәселен, мемлекеттік тілді меңге­­­руге қатысты былтырғы об­­­лыстық конкурсына 38 үміт­кер қатысып, олардың бәрі де мем­лекеттік тілді жоғары дең­гейде білетіндіктерін көрсетті. Бір сүй­сін­діргені, сол байқауға қаты­су­шы­лар­дың 80 пайызға жуығы – Орал қала­сының тұр­ғын­дары және қаланың орыс мектептерінде білім алған жер­лестеріміз. Қазақ тіліне құрмет арта түс­кенді­гінің және бір жарқын дәлелі – «КазАрмаПром» акционерлік қоғамы­ның бас директоры Станислав Кача­лоның отбасы. Осы азаматтың бес перзенті де қазақ мектептеріне барып, сапалы білімге қоса, саналы тәрбие алып жүрген өрендер. Жақын арада Станислав Павловичтің бір ұлы Алматы қаласында өткен республикалық домбырашылар конкурсында көптеген қаракөз құрбы-құрдасының алды болып, бірінші орынды иеленіп, Оралға мерейі өсіп оралды. – Мемлекет басшысы Нұр­сұлтан Назар­баев «Қазақ­стан-2050» Стра­тегия­сын жа­риялаған Жолда­­­уында рес­публикадағы жұмыс беру­ші­лер мүмкіндігі шектеулі жандарды жұмысқа тартуға көңіл аударулары қажеттігін айтқан еді. Бұл бағыттағы іс-шаралардан облыстық Ассамблея да сырт қала алмайтын шығар? – Иә, Елбасымыз мүмкіндігі шектеулі азаматтарға қатысты мұндай мәселені айтпаған күннің өзінде де жұмыс жасауға толық қабілетті, осы арқылы өзін және отбасын қамтамасыз еткісі келетін мүгедек жандарға көмек қолымызды созу – бәріміздің парызымыз. Яғни, біздің қоғам олардың толыққанды еңбек етуі үшін барлық қажетті жағдайларды туғызуға тиіс. Сондықтан да сұрақтарыңда көрсетілгендей, бұл парыздан облыстық Ассамблея да еш сырт, шет қала алмайды. Қазір біз осы топқа кіретін адамдардың тізімін жасау үстіндеміз. Кейін осы бағыт бойынша оларды еңбекке орналастыру жөнінде жұмыс жос­пары бекітілмек. Мұның сыртында облыстық Ассамблеяда үш жүз жетім баланың аты-жөндерінің тізімі жасақталған. Жергілікті кәсіпкерлермен оларға материалдық көмек көрсету жөнінде тиісті ұйғарымдар жасауға қол жеткізе алдық. – Күн өткен сайын Қазақ­стан халқының бірлігі күні – 1 Мамыр мерекесі де жақындап келеді. Облыстық Ассамблея бұл атаулы күнге қандай әзір­ліктер жасауда? – Осы сәуір айының аяғында «Бейбітшілік пен келісімнің жол картасы» атты өңірдің барлық аудандарын қамтыған облыстық мегажоба өз мәресіне жетпек. Нақ­ты айтқанда, сәуірдің 30-ын­да аталған мегажоба эстафетасы Зеленов ауданынан Орал қала­сына ауыстырылады. Сөйтіп, облыс орталығында қорытынды ме­рекелік бағдарламалар өткізілмек. Иә, 1 Мамыр – барша қазақ­стан­дықтарды одан әрі біріктіруге және топтастыруға үндей алатын жар­қын мереке. Сондықтан да осы датаның құрметіне арналған бар­лық іс-шаралар тек Қазақстан халқының жұмған жұдырықтай бірлігі арқылы ғана өзара түсіністік пен табысқа жете алатынын тағы бір айғақтап беруге тиіс деп санаймын. «Бірлесіп көтерген жүк жеңіл» дейді халқымыз. Өңірлік Ассамблея мүшелерінің бүгінгі бас­ты ұстанымы да осындай ха­лық­тық қағидадан қашыққа кетпейді. – Ғайса Хамидоллаұлы, міне, Қазақстан халқы Ассам­блея­сының ХХІ сессиясы өткі­зілетін кезге де келіп қал­дық. Оған Орал өңірінен баратын делегация құрамы жө­нін­де айта кетсеңіз. – Бұл құрамға облыстық Ассам­блея мүшелерінен құралған 20 батыс­қа­зақстандық кірді. Сондай-ақ, облыс аумағында соңғы кездері жаңадан құрылған этномәдени бірлестіктер де бар. Атап айтқанда, мұны «Респуб­лика­лық дүнген мәдени орта­лығы» қоғамдық бірлестігі облыс­тық филиалы және басқа да бірлестіктер жөнінде айта аламыз. Бұлардың бәрі де Қазақстан халқы Ассамблеясы кезекті сессия­сына баратын облыстық делегация құрамына енгізілді. – Әңгімеңізге рахмет. Әңгімелескендер Бауыржан ФАЙЗОЛЛАҰЛЫ, журналист, Темір ҚҰСАЙЫН, «Егемен Қазақстан».   Батыс Қазақстан облысы.