Референдум-2022 • 30 Мамыр, 2022

Жастар белсенді болғаны жөн

29 рет көрсетілді

Елордадағы Жоғары көлік және коммуникация колледжінде Қазақстан мәслихаттары депутаттары бірлестігінің ұйытқы болуымен «Саяси жүйе: жаңа перспективалар» тақырыбында дөңгелек үстел өтті.

Іс-шараны ашқан Нұр-Сұлтан қалалық қоғамдық кеңесінің төра­ғасы, референдумды қолдау жөнін­дегі республикалық қоғам­дық штабтың елордадағы өкіл­ді­гі­нің төрағасы Зұлпұхар Ғайыпов саяси науқанның мемлекет үшін маңызы зор екенін атап өтті.

Басқосу барысында сөз ал­ған Ұлттық ғылым акаде­мия­­сының академигі, филология ғылымдарының докторы Кәрімбек Құрманәлиев жалпы­ха­­лықтық референдумның  Жаңа  Қазақ­станды құрудағы рөліне айры­қ­ша тоқталды.

«Бесінші маусым күні Қазақ­стан халқы тарихи таңдауын жа­сайды. Президент Қасым-Жомарт Тоқаев айтып жүрген «Жаңа Қазақстан», «Әділетті Қазақстан», «Халық үніне құлақ асатын мемлекет» ұғымдарының барлығы да Конституцияға енгі­зіл­гелі отырған өзгерістер мен толықтыруларда толыққанды қамтылған. Сондықтан да біз та­рихтың жаңа бетін айқара ашу жолында жұмылған жұ­ды­рық­тай бірігуіміз керек. Көрші-қолаңға, жастарға, жалпы қазақ­с­тан­дықтарға саяси науқанның маңызын түсіндіріп, оларды бел­сен­ді болуға шақырғанымыз абзал­», деді академик.

Бұдан кейін сөз алған тарихшы Ерназ Батырхан жалпыхалықтық референдум мен Президент ұсын­ған саяси реформалар паке­тінің тәуелсіз Қазақстанды жаң­ғыр­тудағы рөлі зор екенін алға тартты. «Мемлекет басшысы ха­лықтың пікірімен санасқанды мақұл көріп отыр. Сондықтан да бұл саяси науқанда жастар жағы белсенді болғаны жөн. Мұндай маңызды науқаннан шет қалуға болмайды» деді ол.

Іс-шара барысында сөз сөй­ле­ген Мемлекет тарихы инс­ти­тутының жетекші ғылы­ми қыз­меткері Бауыржан Шерияз­данов конституциялық рефор­ма­ның негізі демократиялық үдеріспен астасып жатқанына назар аудартты. «Алдағы референдумда халық қолдаса, Ата Заңдағы 33 бапқа өзгерістер мен толықтырулар енгізілмек. Бұған дейін Президент Қасым-Жомарт Тоқаев билік пар­тиясының төрағалығынан бас тартқаны мәлім. Бұл – де­мок­ратиялық қоғамның көрі­ні­сі. Өз кезегінде саяси партия құ­руға ниетті азаматтарға да жағ­­­дай жасалды. Бұл алдағы сай­­лауларда партиялардың бәсе­ке­лестігі тең дәрежеде өте­тінін білдіреді. Сондай-ақ Мемлекет басшысының Мәжілістің рөлін күшейтуге ден қойғаны да қуан­тып отыр. Бір сөзбен айтқанда, Президенттің саяси реформасы елдің көңілінен шығатыны даусыз. Референдум – халық таңдауы, реформаның бастауы. Сол үшін де Қазақстан халқы өз таңдауын дұрыс жасауы керек», деді институт қызметкері.

Кездесуде сөз алған өзге аза­мат­тар да жалпыхалықтық рефе­рен­думның Жаңа Қазақ­стан­ды құрудағы маңызын жан-жақты зерделеп, жиналғандарды саяси науқаннан шет қалмауға шақырды.

Соңғы жаңалықтар

Күзде ауа райы қандай болады

Ауа райы • Бүгін, 13:33

16 тамызға арналған валюта бағамы

Экономика • Бүгін, 09:47

1453 адам коронавирустан жазылып шықты

Коронавирус • Бүгін, 09:06

Жігіттермен күш сынасқан ару

Ұлттық спорт • Бүгін, 08:43

Қытайдан қалып қойдық

Спорт • Бүгін, 08:42

Табыстары – 2 117 000 доллар

Спорт • Бүгін, 08:40

Ұқсас жаңалықтар