Ұйымдастырушылар сенбілік өтетін орын кездейсоқ таңдалмағанын айтады. Көкжайлаудың танымалдылығы аймақтың экожүйелерінің жағдайына кері әсер етті.
Қоғамдық іс-шараны ұйымдастырған ынталы топтың бірі Kaz Eco Patrol-дің өкілі Александра Адверсаның баяндауынша, Көкжайлауға деген алматылықтардың ықыласы ерекше. Содан кейін биылғы сенбілік барысында алматылықтарда экологиялық және тазалық мәдениетінің қалыптасып қалғаны айқын көрінді. Сенбілік нәтижесі көрсеткендей, қоқыс қалдықтары алдыңғы жылдармен салыстырғанда аз шығарылды. Бұл – жағымды жаңалық. Дегенмен сенбілікке қатысушылар аялдамаға дейін 10 шақты қап қоқыс жинаған. Табиғатқа шығатын алматылықтар арасында темекі тартқанды ұнататындар да көп екен. С.Адверса айтып өткендей, Көкжайлау бағытын бетке алған тазалық сақшылары – «Просвещенец» демалыс үйі, екінші топ – «Алма-Арасан» демалыс бағытындағы тау шатқалдарын тазалап, Көкжайлауда кездесті. Таратып айтқанда, екі бағытты бетке алған демалыс сақшылары «Кездесу орны – Көкжайлау» деген ұстанымға басымдық берді.
Ағаштарды қураған бұтағынан тазартып, жол бойындағы орындықтарды, жол белгілерін тазалап, бояп, ретке келтірді. Жастардың айтуынша, бұл сенбілік бұрынғыдан өзгеше. Себебі олар жиналған қоқыс арасынан пластиктерді бөліп алып, қалдықтарды қайта өңдеуге өткізген. С.Адверсе сөз арасында жаз-күз маусымында мұндай сенбіліктерді жиі өткізу тек экологиялық жағынан емес, экономикалық жағынан да тиімді екенін атап өтті. Себебі жылдағыдай тау шатқалдарынан жиылған қоқыс қалдықтарының 80 пайызы – ПЭТ бөтелкелері.
