Қаламгермен кездесу

Кеше Қазақ Ұлттық өнер университетінде «Ес-Аймақ» мәдени-танымдық пікірталас бірлестігінің ұйымдастыруымен «Егемен Қазақстан» республикалық газеті» акционерлік қоғамының президенті Сауытбек Абдрахмановпен шығармашылық кездесу өткізілді. Кездесуді университеттің аға оқытушысы Жаңагүл Сұлтанова жүргізді. Белгілі қаламгердің өмірге, қоғамға, өнерге көзқарасы, түрлі оқиғалар мен тәжірибелерден түйген пікірлері кездесудің арқауына айналды. Жастар Сауытбек Абдрахмановқа көкейдегі сұрақтарын қойып, тиісті жауаптар алды. Публицист шығармашылығы туралы университеттің өнертану кафедрасының профессорлары, көрнекті жазушы-драматург Әкім Тарази, танымал театр сыншысы Әшірбек Сығай, театр, кино және теледидар факультетінің деканы Сәулебек Асылхан өз ойларын ортаға салды. Университет проректоры, белгілі композитор Серік Еркімбеков оқу орнының қонағына ілтипат білдіріп, шығармашылық табыс тіледі. Басқосуда студенттер қауымы тарапынан ән айтылып, күй тартылып, қаламгерге құрмет көрсетілді. «Егемен-ақпарат».