![«Адасқандар» абыройға бөледі](/media/2022/05/30/t-1.jpg)
Аталған театр байқауда көрермен мен қазылар алқасының назарына өнер қайраткері Кеңес Жұмабековтің «Адасқандар» драмасын ұсынды.
Атығай Шанин театрының режиссері Арайлым Құснидтенова қойылым көрерменнің жүрегіне жол таба алғанына қуанышты екенін жеткізді.
– Шығарманың мән-мағынасы өте терең және оқиғасының желісі басты кейіпкерлердің шынайы сезімдерін жан-жақты ашып көрсетеді. Әлбетте, қазылар алқасының актерлеріміздің еңбегін жоғары бағалағанына қуаныштымыз. Бұл бірінші жеңісіміз емес әрі соңғысы да болмауы керек деген үміттеміз, – дейді режиссер.
Халық театрларының байқауында Ұлытау ауданынан келіп қатысқан «Кеңгір» ұжымына Флорид Буляковтың «Күйеуге шыққан кемпірлер» пъесасының желісі бойынша қойған трагикомедиясы үшін бірінші жүлде берілсе, Шет ауданының орталығы Ақсу-Аюлы кентінің халық театры екінші орынға лайықты деп танылды. Өнер ұжымы қазылардың талқысына Тынымбай Нұрмағанбетовтің «Табалдырығыңа табын» драмасын ұсынған болатын.
Ал жүлделі үшінші орынды Олжас Жанайдаровтың «Жұт» пъесасын сахналаған Қарқаралы ауданындағы Тәттімбет атындағы ауылдың театры иеленді.
Халық театрлары байқауының жеңімпаздары мен жүлдегерлері дипломдармен, ақшалай сертификаттармен және арнайы сыйлықтармен марапатталды. Сонымен қатар өнер ұжымдарын Шолпан Жандарбекованың ұрпақтары да құттықтады.
Қарағанды облысы,
Қарқаралы қаласы