Дуальді жүйе жүзеге аса бастады

Жасыратыны жоқ, бүгінде дуальді оқыту деген не, оның қандай пайдасы бар екенін түсінбей жүрген жандар да жоқ емес. Дуальді жүйе­нің негізі – оқушыны оқу орны мен өндірісте қатар оқыту. Яғни, оқушы тек кітаптан оқып-тоқи бермей, өнді­рісте сол білімін іс-тәжірибе ретінде сынап көруі қажет. Әйтсе де, дәл қазір техникалық және кәсіптік білім беретін оқу орындары арасында осы дуальді оқытуға байланысты бірқатар мәселелер бар екені жасырын емес. Мысалыға, оқушыны өз мамандығының қыр-сырына үй­рететін шаруашылық кәсіп­орындар дуальді жүйеге өтіп, оқу орындарымен бірлесіп жұмыс істеуге қаншалықты құлықты? Сосын өндірістік іс-тәжірибе са­бақтарын кім өткізеді, мұғалімдер ме, жоқ, сол кәсіпорынның мамандары ма? Міне, бұл жерде еліміздің Білім және ғылым министрлігі мен Еңбек және халықты әлеуметтік қорғау министрлігі бірлесіп жұмыс істеп, көп мәселені дұрыс жолға қоя білуі қажет. Елбасы Нұрсұлтан Назарбаев «Дуальді кәсіптік білім беруді дамы­тудың маңызы зор. Бұқаралық маман кадрларының жетіспеушілігін еңсеруге мүмкіндік беретін заманауи қолданбалы біліктілік орталықтары қажет» деп, бұл жүйені кеңінен енгізуге нақты тапсырмалар жүк­теген болатын. Жақында Құлан ауыл ­шаруашылығы колледжінде осы іске серпін берген бір игілікті тірліктің куәсі болдық. Бұрын бұл оқу орнының агрономия мамандығы бойынша білім алып жатқан оқу­шылары өндірістік іс-тәжірибені түрлі шаруашылықтарда өткізетін. Жасыратыны жоқ, күздің, қыстың суық күндерінде оқушылардың кабинетте кітапқа шұқиғаннан басқа амалы жоқ еді. Енді, міне, колледж өз ғимараттарының жанынан жылыжай ашып, дуальді жүйеге қол жеткізіп отыр. «Өткен жылы облыстық білім басқармасы біздің колледжге 25 миллион теңге бөлген болатын. Бұл қаржыға интерактивті тақта, бейнекамералар, техника және ветеринарлық лабораториялық жабдықтар алынды. Және 4 миллион теңгеге 4 соттық жылыжай аштық. Бұл жылыжай оқушыларымызды дуальді жүйеде оқыту үшін өте тиімді болып тұр. Агроном мамандығында оқып жатқан жастар осы кешеннен үлкен тәжірибе жинақтайды. Бұл жалған ұран, науқаншылдық үшін емес, оқушылардың біліктілігін көтеру үшін жасалып отырған шаруа», дейді бұл жөнінде колледж директоры Жұмагүл Бүкірова. Иә, шынында қазір жылыжайдың жапырағы жайқалып, алғашқы өнім жиналып жатыр екен. Осы колледждің студенті Әйгерім Болатханова 4 соттық жерде 4 айдан бері еңбектеніп, мол өнім алудың жолдарына түрлі зерттеу жасағандарын айтады. «Осы уақыт ішінде оқушылар талай тәжірибе жасап, көп нәрсеге қанықты. Қиярдың қандай түрін егу керек, ыстық-суыққа төзімді ме, өнімді қалай береді, қандай топыраққа отырғызу керек, міне, осы мәселеге жастар асқан қызығушылық танытты. Олар осы жылыжайдан үйренген тәжірибесін шаруашылықтарда да кеңінен пайдаланады деген ойдамын» дейді ол. Жалпы, бүгінде Жамбыл облысында 51 кәсіптік-техникалық колледж бар болса, соның 11-і 19 мамандық бойынша түрлі кәсіп­орын­дармен 123 келісімшарт жасасыпты. Яғни, дуальді жүйе Жам­был жерінде жүзеге аса бастады деген сөз. Оралхан ДӘУІТ, «Егемен Қазақстан». Жамбыл облысы.