Бұл туралы аталған қаржы орталығының баспасөз қызметі хабарлады. Мұнда сарапшылардың бірлескен командасы Орталық Азия мен ТМД-дағы компанияларға инновациялармен жұмыс істеуге және бизнестің тиімділігін арттыруға көмектеседі.
CorpUp Central Asia – бұл АХҚО Tech Hub сарапшылары мен «ИБДҚ акселераторының» корпорациялардың бизнес міндеттерінің технологиялық шешімдерін табуға, сондай-ақ өнімді тәсілдерді енгізуге, қызметкерлер арасында инновациялар мен ішкі кәсіпкерлік мәдениетін дамытуға арналған алаң. Мұның барлығы компанияларға инновацияларға жұмсалатын шығындарды қысқартуға және жаңа өнімдерді нарыққа шығаруды жеделдетуге мүмкіндік береді.
CorpUp Central Asia ірі бизнеске арналған 30-дан астам корпоративтік акселераторды іске асырған. ТМД-дағы технологиялық стартаптардың ірі базаларының бірін құрып, Қазақстан, Өзбекстан, Ресей және тағы да басқа елдердегі компаниялардың нарығы мен технологиялық міндеттерін терең түсінетін командамен құрылған.
Былтыр АХҚО Tech Hub және «ИБДҚ акселераторы» командалары Mastercard халықаралық төлем жүйесінің қолдауымен еліміздің банктерімен жұмыс істеуге мүдделі технологиялық стартаптарға Қазақстанның алғашқы қаржы-технологиялық акселераторын іске қосты. Шешімдерді іздеу 11 бағыт бойынша жүргізіліп, акселераторға 272 өтінім қаралды. Бағдарламаның серіктес банктері – Altyn Bank, Eurasian Bank және Freedom Finance Bank.
«Бұл жоба Қазақстандағы стартаптардың инновациялық шешімдеріне үлкен сұраныс пен технологияларды енгізу тұрғысынан өңірдің тартымдылығын көрсетті. Түрлі салалардағы корпорацияларды ынтымақтастыққа шақырамыз», деді АХҚО Tech Hub корпоративтік инновациялар жөніндегі басшысы Әсел Абдрахманова.
Интернет-бастамаларды дамыту қоры корпоративті бағдарламалар бөлімінің директоры Ирина Тарасованың айтуынша, Қазақстанда технологияларға деген қызығушылық жоғары. Аймақтағы корпорациялардың алдында үлкен перспективалар ашылып, тек ТМД-да ғана емес, сонымен қатар дүниежүзілік деңгейде ірі ойыншы атануға толық мүмкіндік бар.
«Алайда Орталық Азия корпорацияларының көпшілігі стартаптармен әлі жүйелі жұмыс жүргізбеген. Ал стартаптар әрдайым қажетті шешім ұсына алмайды. Осы кедергілерді алып тастап, аймақтағы корпорациялардың технологиялық дамуына қолдау көрсету үшін серіктестермен бірге стартаптар мен корпорациялардың тиімді әрекеттесуге септесетін алаң құруды ұйғардық», деді И.Тарасова.
«ИБДҚ акселераторы» – Ресейдегі корпоративтік инновациялар нарығының негізгі ойыншыларының бірі. 2013 жылдан бастап корпорацияларға стартап шешімдерін тауып біріктіруге, сол секілді компания ішіндегі өнімдер мен адамдарды дамытуға септесіп келеді. Сондай-ақ Ресейдің ірі компаниялары үшін ішкі кәсіпкерлік пен көшбасшыларды дамыту бағдарламаларын ұйымдастырады. Әлемдегі алғашқы сатылардағы мәмілелер саны бойынша топ бестікке кіреді.
