Бұл аты мен заты ерекше концерт Мемлекет басшысы Қасым-Жомарт Тоқаевтың бастамасымен құрылған Абай облысының ресми ашылуы кезеңіне және әлемдік деңгейдегі заңғар жазушы Мұхтар Әуезовтің туғанына 125 жыл тоуына арналды.
«Құтты қонақ келсе, қой егіз табады» дегендей, дәл сол күні Еуразия университетінің әлемдік QS World University Rankings рейтингі бойынша 277 орынды иеленгені мәлім етілді. Дүниежүзінің үздік 3 мың университеті арасынан осылай алғы шептен көріну – тамаша жетістік! Бұл – Қазақстан жоғары білімінің абыройы.
Жаңа Қазақстанмен бірге қайта жаңарған Абай облысындағы Әміре Қашаубаев атындағы мемлекеттік филармония – 77 жылдық тарихы бар өнер ұжымы. Әу баста оның іргетасын қалаған әнші-күйшілердің шығармашылығын классик-жазушы Мұхтар Әуезовтің өзі тамашалап, жоғары баға бергені де мәлім.
Өнер ұжымы кейін, 1965 жылы «облыстық мемлекеттік филармония» мәртебесін алды. 1969 жылдан атақты әнші Әміре Қашаубаевтың есімін иеленді. Аталған мемлекеттік филармонияның тарихы мен өнер тағылымы айрықша. Мәдениет Ешекеев, Болат Сыбанов, Дауыл Хайруллин, Келденбай Өлмесеков, Роза Байдалина, Мәулен Масалимов, Мархаба Керімқұлова, Сағи Мекішов, Мырзағали Айдаболов, Рахымбек Ноғайбаев, Жолдыбай Дәстенов, т.б. бұрынғы-кейінгі семейлік шығармашыл тұлғалардың есімі отандық мәдениет тарихына енгенін мақтанышпен айтуға болады.
Соңғы жылдары филармонияны басқаруға ЕҰУ-да қызметте шыңдалған Қазақ ұлттық музыка акдемиясының түлегі, мәдениеттану магистрі, танымал күйші Айбек Бекбосын басқарып жүр.
«Абай жолымен» концерті аталған филармонияның «Бибігүл қазақ халық аспаптар оркестрі» сүйемелдеген А.Бекбосынның ұлы Абай мен оның ақындық айналасына, даңқты абайтанушыларға арналған «Телғара» күйімен ашылды. Жиналған елорда зиялылары мен оқытушы-ғалымдар сахнада өнер көрсеткен дирижерлер – Нұрлан Төкей, Әділет Серіков, әншілер – Мапруза Өтуленова, Еркебұлан Мұсаев, Гүлдана Ноғайбаева, Әйгерім Тоқтыбаева, Әйгерім Әшірова, Дина Исбекова, Кенжегүл Ақшекина, Жасұлан Тәжиев, домбырашылар – Әділет Серіков, Ерзат Мағуфаров, Думан Нұрқамысов, Ерболат Талапхан, т.б. ізденісі мен талғамына, сезім пернесін дөп басқанына риза болды. Ұлы Абайдан бастап отандық композиторлардың, әлемдік тұлғалардың классикалық мұрасы шырқалды. Сонымен бірге Нұрбек Өмірбеков пен «Дала үні» акапелласы орындаған М.Дулатұлының «Алаш маршы» жұртшылықтың елдік рухын шыңдай түсті.
Ә.Қашаубаев атындағы мемлекеттік филармония өнердегі және руханияттағы Абай жолын, Мұхтар дәстүрін жаңа деңгейде әкелгеніне куә болдық. Кеш соңында университет ректоры Ерлан Сыдықов елорда жұртшылығы атынан Ә.Қашаубаев атындағы мемлекеттік филармония ұжымына ризашылығын жеткізді.
