Халықтың «Нұр Отанға» сенімі жоғары

Халықтың «Нұр Отанға» сенімі жоғары екенін байқадық, деді тәжікстандық партия өкілі елордадағы кездесуде

«Нұр Отан» партиясы Төрағасының бірінші орынбасары Бауыржан Байбек Тәжікстан халықтық-демократиялық партиясы төрағасының орынбасары Асрор Латиповтың Қазақстанға сапары аясында кездесті. Онда партияаралық өзара қарым-қатынасты нығайту мәселелері тал­қыланды. Б.Байбек Қазақстан мен Тәжік­станды уақыт сынынан өткен тату көр­шілік байланыстыратынын атап өтті. Тәуелсіздікке қол жеткізген уақыттан бері қос ел арасындағы қарым-қатынас достық пен әріптестік ауанында дамып келеді, деді ол. «Сіздердің сапарларыңыздың алдында ғана Астанада ұлтаралық және конфессиялар арасындағы келісімді нығайтуды көздейтін Қазақстан хал­қы Ассамблеясының XXI сессиясы болып өтті. Партия Төрағасы, Елба­сы Н.Ә.Назарбаевтың салиқалы саяса­тының арқасында Қазақстан бүгінде ел дамуының, «Қазақстан-2050» Стратегиясын жүзеге асырудың басты шарты болып табылатын этностар арасындағы келісімнің қалыптасқан моделін мақтан етеді», деп атап өтті Бауыржан Байбек. Ол, сондай-ақ, Қазақ­станда өмір сүріп жатқан 130 ұлт­тың бір өкілі – тәжік диаспорасы бүгін­де бірлік, тұрақтылық, достық пен то­леранттылық басты құндылықтар саналатын қазақстандық қоғаммен біте қайнасып кеткенін айтты. Өз кезегінде А. Латипов «Нұр Отанды» 15 жылдығымен құттықтап, «Нұр Отан» партиясының  15 жылдық жұмыс тәжірибесі мен қазақстандық этносаралық келісім мен ұлттық бірлік моделімен танысуға мүмкіндік туған бұл сапардың маңызы зор екенін жеткізді. «Біздің халықтарды ұзақ жылдарғы достық жақындастырады. Бүгін Тұңғыш Президент Нұрсұлтан Назарбаевтың мұра­жайында болып, халық достығы жо­ғары бағаланатынына тағы бір мәр­те көз жеткіздік. Мемлекеттің гүл­де­нуіне мықты және беделді адам ғана осынша жұмыс жасай алады, ал Нұр­сұл­тан Әбішұлы дәл сондай адам. Ол бүгін­де тек аймақта ғана емес, одан тысқары жерлерде де көшбасшы ретінде танылған», – деп атап өтті А. Лати­пов. Сондай-ақ, ол «Нұр Отанның» ха­лық­пен жұмыс істеуде жаңа технология­лар­ды қолдану тәжірибесі делегация құра­мын қызықтырып отырғанына тоқ­талды. «Кез келген партияның басым бағыттарының бірі – халыққа жақын болу, оның жайлы өмір сүруіне барлық жағдай жасау. Бізде де қоғамдық қабылдау бөлмелері жұмыс істейді, алайда, бүгінгі көргендеріміз – ерекше, мұндай кең көлемдегі шараларды әлі еш жерде кездестірген жоқпыз. Қоғамдық қабылдау бөлмелерінің жұмысынан халықтың сіздерге деген сенімі байқалады. Ең бастысы, олар өз мәселесін шешу үшін сіздерге келеді. Шешілмей жатқан мәселелер бар, алайда, біз осы жерде оларды шешуге болатынын байқадық», – деген А. Латипов «Нұр Отанның» партиялық жұмыс механизмдерін Тәжікстанда енгізуге ниетті екенін айтты. «Егемен-ақпарат».