Белгілі режиссер Абдулла Қарсақбаев туралы фильм көрсетіледі

АСТАНА. 25 сәуір. Қазақ киносы тарихындағы ірі тұлға, белгілі режиссер Абдулла Қарсақбаевтың өмірі мен қызметі жөніндегі фильм көрерменге ұсынылады. Бұл туралы «Экспресс К» хабарлады. Еңбектері ұлттық киномыздың алтын қорынан ойып орын алған Абдулла Қарсақбаевты талайлар қазақ кинематографиясының әкесі деп санайды. Ол Алматы облысы Жамбыл ауданында туған. Ұлы Отан соғысы жылдарында елмен бірге көптеген қиыншылықтарды басынан өткереді. Талапты жас 1950 жылы Бүкілодақтық кинематография институтына оқуға түседі. Қазіргі кезде Абдулла Қарсақбаевтың түсірген фильмдері жұртшылыққа кеңінен таныс. Әрине, бұл жөнінде шағын ақпаратқа бәрін сыйдырып айту мүмкін емес. Ол алғашқы жұмысын деректі фильмдер түсіруден бастағанын біреу білсе, біреу білмейді. А.Қарсақбаевтың «Қазақ халқының қолөнері» атты деректі фильмі кезінде Канадада өткен байқауда арнайы сыйлыққа ие болыпты. Аталған шығарманы 40-тан астам ел асқан қызығушылықпен сатып алғанын да айта кетейік. Бүгінде Абдулла Қарсақбаевтың ісін ұлы Тоқтар жалғастыруда. Тоқтар Қарсақбаев жоғарыда айтып өткеніміздей, әкесі жөнінде деректі фильм түсірді. Ол бұл еңбегінде әкесінің режиссерлік қызметі мен ұстаздық қасиетін молырақ қамтыған. Сондай-ақ, айтулы тұлға туралы замандастарының толғаға естеліктері де фильмге арқау болған. Жолдыбай Базар. Дереккөз: «Экспресс К». Фото: Qaznews.kz.