Ақтөбе облысында балықтардың жаппай қырылуы орын алды

АСТАНА. 25 сәуір. Ақтөбе облысы аумағындағы Батпақты өзенінің жағалауынан қырылып жатқан сазан тұқымдас аққайран балықтары табылды. Бұл туралы «Экспресс К» хабарлады. Жергілікті тұрғындар бір ауыздан балықтардың өлуіне шошқа фермасынан шығатын қалдықтардың тікелей әсері тиіп отырғанын айтуда. Түсіндіре сөйлесек, шошқа фермасының жуынды-шайындысы құйылатын қазаншұңқыр ернеуінен аса толған. Содан асып-төгілген қалдықтар Батпақты өзеніне құйылған. Өзенге құйылған лас заттардан әлгі балықтар уланған. Бестамақ ауылы азаматтары осылай дейді. Ұзақ жылдардан бері аталған ауылда тұрып келе жатқан Орынбасар Өтегенов деген 80 жастағы қария: «Егер шошқа фермасы жақтан жел тұрса, дем алу мүмкін болмай қалады. Оның уы тек балықтарды емес, мына айналаның өзін құртып бітетін болды», – дейді қынжыла. Қазір өлі балықтардың ағзасы және өзен суы тексерілу үстінде. Орын алған жағдай тиісті орындардың бақылауында. Жолдыбай Базар. Дереккөз: «Экспресс К». Фото: Ohotniki.kz.