Ұжымды Ақпарат және қоғамдық даму министрі Асқар Омаров арнайы келіп құттықтады.
– Үш жыл бұрын Мемлекет басшысы Қасым-Жомарт Тоқаев Бұқаралық ақпарат құралдары қызметкерлері күнін арнайы Жарлықпен бекіткен болатын. Сол уақыттан бері бұл журналистер қауымы асыған күтетін мерекеге айналды. Үш жылда көп өзгеріс болды. Отандық медиа жақсы дамып келеді. Egemen Qazaqstan және «Казахстанская правда» газеттері өз биігінен түспей, атына заты сай басылымдар екенін дәлелдеп отыр, – деді Асқар Омаров.
Министрдің айтуынша, қос газетті де ел Президенті мұқият оқиды. Басылымдарда шыққан өзекті материалдар бойынша тиісті орындарға тапсырма береді.
– Мәселен, Мемлекет басшысының Egemen Qazaqstan газетінде жарияланған Батыс Қазақстан облысындағы жол мәселесіне қатысты мақалаға назар аударып, соның нәтижесінде үлкен жұмыстар қолға алынғаны көпшіліктің есінде деп ойлаймын. Ахмет Байтұрсынұлы «Газет – халықтың көзі, құлағы һәм тілі» деген болатын. Бұдан асырып айта алмаспыз. Egemen Qazaqstan және «Казахстанская правда» газеттері Ахмет бабамыз айтқан үдеден шығып отыр. Себебі елімізде классикалық түрде конвергенттік форматты пайдаланып жүрген басқа басылым жоқ. Кәсіби мереке қарсаңында бір шаңырақ астына ұйысқан қос ұжымға толағай табыс тілеймін. Жұмыстарыңыз жемісті болсын! – деді министр.
Асқар Омаров қос газеттің қызметкерлеріне Президент Қасым-Жомарт Тоқаевтың Алғыс хатын және министрліктің арнайы марапаттарын табыс етті. Сондай-ақ Egemen Qazaqstan және «Казахстанская правда» газеттерінің 100 жылдығына арналған мерейтойлық медальдарды тапсырды.
Басылымдардың ұжымы табиғат аясында волейбол, арқан тарту, асық, бес тас, садақ ату секілді спорт түрлерінен сынға түсті. Сонымен қатар экспромт мүшәйра ұйымдастырылды. Әсем ән де шырқалды, би де биленді. Үздік шыққандар арнайы сыйлықтармен марапатталды.
Шаттыққа бөлеп, шалқар шабыт сыйлаған іс-шарадан журналистер қауымы көтеріңкі көңіл күймен тарқасты.
