Күн тәртібінің жобасы нақтыланды

Кеше Мәжіліс Төрағасы Қабиболла Жақыповтың төраға­лы­ғында палата бюросы өтті. Онда палатаның алдағы жалпы отырысы күн тәртібінің жобасы нақтыланды, деп хабарлады Мәжілістің баспасөз қызметі. Депутаттардың талқылауына «Кәсіптік одақтар туралы» заң жобасы ілеспе түзетулерімен бірінші оқылымға шығарылатын болды. Күн тәртібінің жобасына Әкімшілік құқық бұзушылық туралы кодекс жобасы ілеспе түзетулерімен екінші оқылымға қосылып отыр. Салалық коми­тет­тің баяндауынша, Кодекс жобасы әкімшілік заңнаманы елеулі түрде реформалауға, мемлекеттік органдардың әкімшілік жа­заларды қолдану жөніндегі өкі­леттіктерін айқындауға ба­ғыт­талған. Кодекс жобасына сәйкес әкім­шілік заңнама ізгілендіру, соттарға түсетін жүктемені азайту жолымен реформаланады. Осыған байланысты соттардың және әкімшілік құқық бұзушылық туралы істерді қарауға уәкілеттік берілген органдардың (лауазымды адамдардың) құзыреті қайта қаралды. Осы күні депутаттар ратификацияланатын екі заң жобасына қорытынды әзірлеу мезгілін нақтылайтын болады. Олар: Есірткі, психотроптық заттар мен олардың прекурсорларын Кеден одағының кеден аумағы арқылы өткізу тәртібі туралы ке­лісім және 2010 жылғы 9 жел­тоқ­сандағы Қазақстан Респуб­ликасының Үкіметі мен Р­ес­ей Федерациясының Үкі­меті арасындағы Қазақстан Респуб­ликасына мұнай және мұнай өнімдерін жеткізу саласын­дағы сауда-экономикалық ынты­мақ­тастық туралы келісімге өзгерістер енгізу туралы Хаттама.