«Шашу» халықтық ансамблінің репертуары өте бай. Халық композиторларының күйлері мен әндері, қазақ, орыс және шетел композиторларының шығармалары да бар. Құрылған күнінен бастап ансамбль халықаралық, республикалық, облыстық және қалалық байқаулардың лауреаттары атанып үлгерген.
Ансамбль құрамында 21 бала бар, оның 18-і – патронаттық тәрбиеде. Өмірхан Жетесов пен Амангүл өнерге жақын жандар болған соң, бауырына басқан әрқайсысын ерекше қамқорлық пен мейірімділік таныта отырып, оларды музыка мен өнерге баулыды. Бүгінде балалардың бірі дәстүрлі ән орындаса, бірі домбыра, қобыз тартады, енді бірі жетіген, сыбызғы және өзге де аспаптарда шебер ойнайды. Отбасы мүшелерінен құралған отбасылық ансамбль қазір көпшілікке танымал. Аталған іс-шараға Нұр-Сұлтан қаласы «Білім жаңғырту» орталығының өкілдері, оқушылар және ата-аналар, білім беру ұйымдарының ұстаздары қатысты.
«Елордамыздағы Махамбет Өтемісов атындағы Оқушылар сарайында республикамызда өтіп жатқан биылғы Балалар жылына орай «Елорда Билер қоғамы», қалалық білім басқармасы, «Білім жаңғырту» орталығы, №1 балалар музыка мектебінің ұйымдастыруымен, сонау Ақтөбеден арнайы келген Жетесовтер отбасылық концерті үлкен деңгейде өтті. Ине шаншар орын жоқ, залдағы толы көрерменнің зор ықылас, ризашылығына бөленді десе артық айтқан болмас. Өздерінің үш баласымен қоса 18 баланы (өзге ұлттардан да бар) ұлттық тәрбиеге, оның ішінде өнерге баулып, соның биік шыңына шығару әркімнің қолынан келмес. Міне, осындай батыр отбасыны арнайы құттықтауға Парламент депутаты, «Ақ жол» партиясының мүшесі, ақын Қазыбек Исаның келіп құттықтап, партия атынан 21 баланың әкесі Өмірханның кеудесіне төсбелгі тағуының өзі аталған өнерпаз отбасыға үлкен құрмет болды», дейді ұйымдастырушылар.
