«Жалпы тұрғын үй саласындағы тәсілдерді топтастырып, бір ретке келтіру үшін Тұрғын үй-коммуналдық инфрақұрылымды дамытудың 2026 жылға дейінгі тұжырымдамасын қабылдау жұмыстары басталып кетті. Жаңа тәсілдердің және механизмдердің маңыздылығы мен әлеуметтік бағытын ескере отырып, олардың барлығын тиімді, уақтылы әрі сапалы іске асыру қажет», деді Үкімет башысы.
Оның айтуынша, жаңа тұжырымдама аясныда мынадай бағыттарда жұмыстар атқарылуы керек.
«Бірінші, Индустрия министрлігі тұрғын үй саясатындағы жаңа тәсілдер бойынша заң жобасының барлық ережелерін Парламент палаталарымен сапалы әрі жедел пысықтауды қамтамасыз етсін. Екінші, Индустрия министрлігі мен мүдделі мемлекеттік органдар қажетті дерекқорлармен толыққанды интеграциялап, тұрғын үй саласындағы барлық ақпараттық жүйелерді іске қосу жұмыстарын аяқтасын. Үшінші, Баспанаға мұқтаж адамдарды тұрғын үймен қамтамасыз ету – аса маңызды міндет. Сондықтан, Индустрия министрлігі мен барлық өңір әкімдері тұрғын үй және инженерлік инфрақұрылымның жоспарланған көлемін уақытылы іске қосу үшін түбегейлі шаралар қабылдауы керек», деді Әлихан Смайылов.
