Қамкөңіл жанға қамқорлық

Ақтөбе облысының кәсіп­кер­лер палатасы мүмкіндігі шек­теулі жандарға әрдайым көмек қо­лын созуға дайын. Облыстық кәсіпкерлік палатасының Ембі қала­сындағы филиалының бас­шы­лығы үшінші топтағы мүгедек Қайрат Есекеновтің өз ісін ашуына көмектесетін болды. Филиал директоры Тілек Нақпаевтың айтуынша, ол өзінің шағын кәсіп­керлігін ашуға филиалға кеңес алуға жолыққан. Қайрат Есе­ке­нов кезінде дүкен ашу үшін ғи­марат салған екен. Алайда, бір се­бептермен дүкенді ашып үлгер­мепті. Содан кейін мұнда плас­тик терезе жасайтын цех орналас­ты­руды шешкен. Ол «Бизнес-кеңес­ші» кәсіпкерлікті дамыту қо­рының бағдарламасы бойын­ша екі апталық курс тізіміне енгі­зілген. Содан кейін оған қажетті қондырғылар сатып алу үшін несие алуға жол ашылады. – Бұл қаржы оған қондырғы сатып алуға қажет. Жігерлі жан­ның мүгедектігіне қарамастан өз ісін ашуға құштарлығы мен ын­талылығы тәнті етеді. Оның биз­не­сінде барлық отбасы мүшелері еңбек ететін болады, – дейді филиал басшысы Тілек Нақпаев. Сатыбалды СӘУІРБАЙ, «Егемен Қазақстан». Ақтөбе облысы, Мұғалжар ауданы.