Оқу-ағарту министрлігінің мәлімдеуінше, педагог-ассистенттер ерекше білім беру қажеттілігі бар балаларға көбірек көңіл бөлуді талап ететін инклюзивті оқытуда сұранысқа ие. Педагогтер ерекше оқушылардың мектепке және оқу үрдісіне бейімделуіне көмектеседі.
Аталған ведомство жанындағы Мектепке дейінгі және орта білім комитетінің төрағасы Гүлмира Кәрімова:
«Оқу-ағарту министрлігі ерекше білім беру қажеттілігі бар балалардың білім алуына жағдай жасау үшін жұмыс жүргізіп жатыр. Бұған дейін министр Асхат Аймағамбетов осындай штат енгізуді тапсырған болатын. Енді 1,5 мыңға жуық педагог-ассистент ерекше балалар оқитын мектептерде жұмыс істеп жатыр. Бұл мұғалімнің өзін алмастыра алмайды. Десе де педагог-ассистенттер ерекше рөл атқарады, олар балаларға бағыт беріп, оқу үрдісіне бейімделуге көмектеседі. Біз ерекше қажеттілігі бар балалар туралы айтып отырғандықтан, мысалы, егер бала өздігінен қозғала алмаса, онда педагог-ассистенттер техникалық көмек көрсетеді. Не болмаса балаға дефектологтің көмегі қажет болса, педагогикалық қолдау көрсетеді», дейді.
Педагог-ассистент жоғарыда айтылған функцияларға қоса ерекше білім беру қажеттілігі бар балаларға арналған жеке білім беру бағдарламаларын әзірлеуге қатысады. Қажет болған жағдайда оқу бағдарламалары оқушылардың ерекшеліктері мен қажеттіліктеріне қарай бейімделеді. Педагог-ассистенттер өткен материалды меңгеруге көмектесіп қана қоймай, ерекше баланың дағдыларының даму деңгейін де бақылайды. Сондай-ақ олар ерекше білім алуды қажет ететін балалардың қауіпсіздігі мен денсаулығына қажетті жағдайлардың сақталуын қадағалайды.
Министрлік алдағы уақытта педагог-ассистент лауазымын мектепке дейінгі ұйымдарға да енгізбек.
